यौटा अज्ञात गर्भाशय बोकेर
दौड्दैछे विवश कुमारी ।
नांगो खुट्टाले र फुलेको भुँडी हल्लाएर
खोज्दैछे पि्रय आकाशलाई वा आकाश
उनलाई लखेट्दैछ पुनः असुरी बलात्कार गर्नलाई ।
जुन बेगमा दौडे पनि समात्न सक्तिनन््
जति आँगनमा पुगे पनि भेट्न सक्तिनन्
पुगून् जुनसुकै गोलार्द्धमा
कुमारी चुम्न सक्तिनन् नीलो देखिने आकाशलाई ।
आकाश फैलिएको सर्वत्र कुनासम्म
जहाँसम्म लुकून् उनी
जुन बेला लुकून् उनी
जुन ठाउँ लुकून् उनी
आकाश जिस्क्याउनेछ उनलाई प्रत्येक लुकामारीमा
आकाश गिज्याउनेछ उनलाई प्रत्येक ऋतुमा ।
उनले दौड्नु हुन्नथ्यो यति विवश भएर
आकाश फैलनु हुन्नथ्यो यति निकृष्ट भएर
विवश हुनु र निकृष्ट हुनुको यो सरल
तर अनौठो स्पर्धामा
दोषी को ?
उनी आकाशलाई लखेट्दैछिन् या आकाश उनलाई
उनी आकाशलाई खोज्दैछिन् या आकाश उनलाई !
विवश कुमारी
विवश आकाश !
नेपाल साप्ताहिक ४२८