दुई चार बर्षअघि
उम्रिएका बैँस छोप्न
दुई चार अमल मात्र कपडा
लाउने कुनै गाउँले तरुनीको
जवानी आँखाले लुट्न
घुमौरा चोक चोकमा
बसेका केही लोकल दादाहरूले
सुसेलेको सिठ्ही जस्तै छिल्लिन्दै
गोरी हिमालका उठेका अग्ला
सेता चुच्चा चुच्चा बक्ष
चुसेर मादक बेहोसीमा
फर्कँदै गरेको सितल बताससँग
बलेसीमा जिस्कन्दै
कतै मुरी कतै मानो
कतै झन्झट र कतै रोमन्स लिएर
भर्खरै छिरेको छ
असार
मेरो आशा नफल्ने
देशको बाझो बारीमा
शायद त्यसैले
उम्रिएका छन केही सुन्दर सपनाहरू
गोडीएका छन केही हरिया खुशीहरू
र सँगै लहराएका छन
केही हाँस्न लागेका ओठहरू
यद्यपि असार आउनु नै
सबथोक आउनु त होइन ।
प्रकाश ढकाल
लेटाङ मोरङ