गरिबको दुख,कष्ट पीर देख्दा दुख्यो मन

गरिबको दुख,कष्ट पीर देख्दा दुख्यो मन
भोको अनि नाङ्गो त्यो शरीर देख्दा दुख्यो मन

भारी बोक्दै उकाली चढ्नु पर्ने दिन भरि
चर्को घाममा अग्लो त्यो भीर देख्दा दुख्यो मन

सहनु पर्ने साहुको हप्कि ॠणको भाखा ननाघ्दै
अभाबले निहुरिएको शीर देख्दा दुख्यो मन

हली बसी भकारी भर्नु पर्छ अर्कैको
छाक टार्न नपुग्ने जागीर देख्दा दुख्यो मन

क को अक्षर नचिनी बित्ने भो जिन्दगी
भाग्यले ठगेको तक्दीर देख्दा दुख्यो मन