-१-
म भोक रोग ओढेर शोक पचाउने देशकी मान्छे
आफू मरेर देश बेच्नेलाई बचाउने देशकी मान्छे
मेरो परिचय न खोज म आवेशमा आउन सक्छु
आफू अग्लिन अनेक लीला रचाउने देशकी मान्छे
-२-
मेरो आदत खराब छ मित्र शत्रु मात्र कमाउँछु
कहाँ जाऊँ आफ्नो देश छोडी मित्र देशमै रमाउँछु
गाँस बास कपास जुटाइ चाडै फर्किने अभिलाषा
दबिएका आवाज बुलन्द पार्न कलम समाउँछु
-३-
कुकर्म गरेपछि शाली नदीमा शरीर धुनुको के अर्थ?
बाँच्ने बहाना सकिएपछि आँसु झारेर रुनुको के अर्थ
मानवले बेलैमा सचेत हुनुपर्छभन्दा पाखुरा सुर्किनेले
याचनाको भीख माग्दै पछुताइ खुट्टा छुनुको के अर्थ