हटेको छ इच्छा घटेको छ आश
कतै छैन सन्तोष यो आसपास
सबै धुर्तले गर्न थाले विनास
यहाँ फुल्न छाडेछ लालीगुराँस ।।
सुधा प्रेम झर्दैछ आभास हुन्थ्यो
यहाँ देवताको सधैं वास हुन्थ्यो
सबै देव भागे नपाएर वास
यहाँ फुल्न छाडेछ लालीगुराँस ।।
ढलेको छ आस्था भनेको म सुन्छु
सुनी ठेडी ठोकी दुबै कान थुन्छु
कडा पापको झन् बढेको छ रास
त्यसैले यहाँ फुल्न छाड्यो गुराँस ।।
यतै भत्किएको उतै भत्किएको
बढी पाप यो देशमै फत्किएको
बुझी यो कुरा बन्द झन् हुन्छ सास
त्यसैले यहाँ फुल्न छाड्यो गुराँस ।।
चल्यो झन् सुनामी दुखेको छ घाउ
प्रभो डुब्छ यो देश आई बचाऊ
विदेशीहरुका सबै देख्छु दास
त्यसैले यहाँ फुल्न छाड्यो गुरासँ ।।
होम सुवेदी