आवाज

सम्माननीय सभासदज्यूहरू,
संसद् सचिवालय, काठमाण्डौ ।

घरको ठेगान छैन, खानकै चिन्ता गर्छ नभन्नुहोला । आएर बोल्न सक्दैन, पत्रमार्फत धम्की पठाउँछ भन्ने नठान्नुहोला । मान्छेको मन भएको बेला पढ्नुहोला अनि संविधान लेख्नुअघि मेरा कुराको स्मरण अवश्य गर्नुहोला ।

मलाई यत्रो आँट किन आउँथ्यो, तपाईँहरूले नै ल्याएको लोकतान्त्रिक गणतन्त्रले सिकायो । सबैले आफ्ना आवाज सुनाएका छन्, म पनि मेरो आवाज हजुरहरू समक्ष बिसाऊँ भन्ने लागेर लेखी पठाएको हुँ ।

पढेर रिसले चुर नबनिदिनुहोला । मेरो जीवनमा अरू अनिष्ट नथोपरिदिनुहोला । लौ, सुन्नुहोस् मेरो आवाज मिश्रित राम कहानी—

तपाईंहरूलाई आफ्नो घरमा रमाउने हक छ भने हामीलाई किन छैन ? अपराध गरे पो जेलमा सड्नु त । विना अपराध जेलमै जन्मनु, जेलमै हुर्कनु र जेलमै सड्नु पर्ने के काइदाको कानुन हो यो तपाईंहरूको ? पेट खाली छ, जुँगा बटारिन्छ, कन्सिरी तानिन्छ, शरीर भाँगलझुँगल पारिन्छ, प्रतिकार गर्न खोजे बल भरिएछ कस्तो दुष्ट भयो भनी खानाको मात्रा कटौती गरिन्छ । आफ्नो रूप बेचेर अर्काको दिल जित्नुपरेको छ र अर्कैको लागि धन कमाइदिनु परेको छ । कर्मचारी खटाएकै छौँ, खानेकुरा जुटाइदिएकै छौँ, बस्ने वास बनाइदिएकै छौँ, विरामी भएको वेलामा ओखतीमुलो गर्देकै छौँ, अर्थोक के चाहियो र यिनीहरूलाई भन्ने ठान्नुहोला तपाईंहरू । तर भन्नुस्, सुनकै पलङमा सुताएर र चाहे बमोजिमका खानेकुरा दिलाएर अनि अरूहरूलाई जिस्काउन, चिमोट्न र खिल्ली उडाउन लगाएर एक्लै कोठामा कैद गरेर राख्यो भने तपाईंहरू मान्नुहुन्छ ? अहँ कदापि मान्नुहुन्न । अधिकार हनन भयो भनी अर्को आन्दोलन गर्नतिर लाग्नुहुन्छ । आफूलाई पर्दा जस्तो हुन्छ, त्यस्तै अरूलाई पनि हुन्छ भन्ने ठानेर संविधान बनाउँदा चिडियाखानामा राखिएका हामी पशुहरूको हकअधिकार बारे पनि सम्बोधन गर्नुहोला ।

किनकि हामी मान दिन तयार छौँ,
हामी त्याग दिन तयार छौँ,
हामी अर्थोपार्जन गर्दिन तयार छौँ,
तर अपमान र तिरस्कार खाएर
अनि रोग, भोक सहेर
रहन तयार छैनौँ ।
आगे हजुरहरूकै कृपा ।
लोकतान्त्रिक नीति धारण गर्न तयार शिरमा ।

ठेगाना ः रुपनगर ः १, प्रगतिटोल, सप्तरी
मो नं ९८०७७७९७६८ वा ९७४३०१२०७६ वा ९८०७७५०८२६
स्नातक (नेपाली)