जिन्दगीको सौदाबाजी, गर्दैछु किन म

जिन्दगीको सौदाबाजी, गर्दैछु किन म
एक बार जिउन दशौं बार खै, मर्दैछु किन म

बसन्त नै आयो भन्छ, कोइलीले कुर्लिएर
मनको आँधीबेहरीमा खै, झर्दैछु किन म

थाहा छ कि यो प्यालाले, पीडा पखालिन्न भन्ने
फेरि प्याला माथि प्याला, भर्दैछु किन म

बारबार मरी जिउनु भन्दा, मरिजानु जाती भन्छन्
फेरि पनि यो मैदानमा, डर्दैछु किन म

चोट पाउँछ बिरालोले, मुसाले धान खाए पनि
फेरि पीडा खेप्न अघि, सर्दैछु किन म

सागर छिचोलेर छोइन्न, त्यो किनारा था’छ मलाई
र पनि यो महासागर, तर्दैछु, किन म

२०६६/०६/१६