झुपडीमा जन्मी हुर्की खोले पिठो खाए पनि
सुन्दर रहेछ मेरै संसार टालै-टालो लाए पनि
धेरै देखें यो संसारमा अन्धकारमा जिउने
ममताको खडेरीमा आँशुधारा पिउने
हाँसे नाम्लो डोको बोकी लेक-बेंसी धाए पनि
सुन्दर रहेछ मेरै संसार टालै-टालो लाए पनि
सँधै पा’थिएँ बाको आशिष माँको न्यानो काखा
कसै सामु झुक्न दिएन बोक्दै भोको आँखा
भोको नाङ्गो हटाउनु भो बिसाल सास्ती पाए पनि
सुन्दर रहेछ मेरै संसार टालै-टालो लाए पनि
झुपडीमा जन्मी हुर्की खोले पिठो खाए पनि
सुन्दर रहेछ मेरै संसार टालै-टालो लाए पनि
-राजेश रुम्बा लामा “अतृप्त”
०१-१२-२०११