रिसाएर जानेलाई

सम्झेको छ भन्दिनु है रिसाएर जानेलाई,
फूलैपर्ने गरी आँखा बिझाएर जानेलाई ।

सधैं सधैं याद गर्छु कहाँ भुल्न सक्छु र म ?
मन्को एउटा नाता पनि सिध्याएर जानेलाई ।

कस्ले रोक्ने,कस्ले छेक्ने बैंश फुल्दै आएपछि,
जताततै पंखहरु फिँजाएर जानेलाई ।

ठिकै भयो,मेरो पनि छैन केही गुनासो त,
आफ्नो छोडी पराई नै रिझाएर जानेलाई ।

यस्तै रैछ माया भन्ने बधाई छ बधाई छ,
दोभान छोडी त्रिबेणीमा मिसाएर जानेलाई ।