सप्तरंगी टिका थापौँला

आशाका दिपहरू बालेर
स्वागतको गीतसँगै
म आउदैछु तिम्रो आँगनमा
देउसी भैलो भएर

पोहोर साल बैनीका आँखाहरू
रसाए होलान दाजुको पर्खाइमा
दिदीका कोशेलीहरू थन्किए होलान
ओइलिएर कुनामा

हाम फालेर उकाली ओराली
अनि चौतारी र भन्ज्यांगहरू छिचोल्दै
म आउदैछु तिम्रो आँगनमा
सप्तरंगी टिका अनि
सयपत्री र मखमलीको माला उनिराख्नु

वीरताको कथा सुनाउला
देश परदेशको व्यथा कहुँला
तिम्रो आशिर्वादमा यो निधार बिसाउँला
म आउदा मायाको त्यो सागर उर्लिएर
छताछुल्ल हुन सक्छ तिम्रो परेली मा
दिदी म आउदैछु /बैनी म आउदैछु

देउसी भैलीसँगै आउँदैछु
आशाका दीपकहरू बालेर
वीरताको गीतसँगै
आत्मविश्वास बोकेर
म आउदैछु यसपाली तिम्रो आँगनमा

आशाका दिपहरू बालेर
स्वागतको गीतसँगै
म आउदै छु तिम्रो आँगनमा
देउसी भैली भएर
सप्तरंगी टिका थाप्न
सयपत्री र मखमली भएर

First published in Majheri at : 2012-11-10 09:36:34 +0900