२१ औं शताब्दीमा
ढुंगे यूग जिइरहेका हामीहरू
मकुराको जालो झै फैलिएका
तारहरू बीच
मैनबत्तीको मधुरो प्रकाशमा
उज्याँलो खोज्ने हामीहरू
सम्पन्नताका नाममा सबै भएरै पनि
उपभोग गर्न बन्चित हामीहरू
आज भोलि हामीहरू
दृष्य नआउने टि.भी हेछौं
आवाज नबज्ने रेडियो सुन्छौं
नघुम्ने पंखामा सितलता खोज्छौं
नतात्ने आइरनले इस्टी लगाउछौं
अनि मख्ख पर्छौं
बिधुत प्राधिकरणको
पाक्षिक उपहार योजनामा
जसले जे सुकै गरोस्
हामी चुपचाप सहन्छौं
लोडसेडिङ्ग जति बढोस्
हामी त्यसैमा रमाउछौं
किनकि हामी २१ औं शताब्दीका
सहनशील मानव हौं
जो चाहिने ठाँउमा बोल्दैनौं
र नचाहिने ठाँउमा बोलिरहन्छौं ।
जितेन्द्र तुलाधर
बुंगमती, ललितपुर