केटा: सपनाकी राजकुमारी भेटें मैले बल्ल-बल्ल
अनायासै हृदय लौ भयो आज झलमल्ल
केटी: सपनाको राजकुमार भेटें मैले बल्ल-बल्ल
के गरूँ म कसो गरूँ परें आज अलमल्ल
केटा: राति-राति सपनीमा मुस्कुराउँदै आउने तिमी
घरी-घरी पिरतीको गीत गुन्गुनाउने तिमी
केटी: आँखा चिम्ल्यो मेरै मात्र ओरिपरि छाउने तिमी
सुस्त-सुस्त नजिक आई हात सुम्सुम्याउने तिमी
केटा: बिपनीमा आफू यता तिमी उता असरल्ल
केटी: के गरूँ म कसो गरूँ परें आज अलमल्ल
केटी: एकातिर थन्क्याएर घरको काम-काजसम्म
सपनाको राजालाई कुरिरहें आजसम्म
केटा: कहाँ-कहाँ खोजें मैले सपनाकी परीलाई
तिम्रै साथ खोजेको थें जुनी-जुनीभरिलाई
केटी: प्रतिक्षाको फल आज प्राप्त भयो बल्ल-तल्ल
केटा: अनायासै हृदय लौ भयो आज झलमल्ल
(ट्रोम्सो/नर्वे; २० फेब्रुअरी, २०१३)