जरो खोज्दै छु म
पहेँलो लहराको ।
किन बगाइरहेछन् मान्छेहरू
पहेँलो रगत ?
पहेँला पसिना
पहेँलो स्वाद
आँसुहरू पहेँला
साराका सारा रंगहरू पहेँलिएका छन्
पहेँला विचारहरूले ।
सेता धोतीहरू पहेँला
काला कोटहरू पहेँला
काला टोपीहरू
कालो छाला
जुत्ताहरू पहेँला ।
खैराहरूको बहुलतामा
कालो टाउकोभित्र
गिदी पनि पहेँलै देखिइरहेछ ।
किन पहेँलिदै छन् दिनदिनै
दिनदिनै
राता मान्छेहरू ।
अचेल
सुन्दरीजलको पानी पनि
पहेँलै बगिरहेछ ।
कहिलेसम्म पिउँछौँ हामी
पहेँलो पानी ?
यसरी पहेँलिँदै गइरहेछ समय कि !
लाग्छ,
यो गोलो पृथ्वीको
०.०३ नं क्षेत्रमा
यो पुरातन पोखरीका
नीला भ्यागुताहरू र तिनका
संबिधान लेख्ने हातका राता छालाहरू
पहेँलो भएरै सुक्नेछन् ।
अँझै…
किन बगाइरहेछन् मान्छेहरू
पहेँलो रगत ।
नेपाल साप्ताहिक
अंक: ५६५
२०७० आश्विन १३
Sep 29, 2013