धेरै दिनदेखि लघुकथा कुनो तथा मझेरीमा उपस्थिति जनाउन सकेको थिइन, त्यसैले आज एउटा कथा लेखेर पोष्ट गर्ने बिचारले कम्प्युटर शुरू गरेँ, कथाको विषयवस्तु सोच्दै थिएँ कि ढोकाको कलबेल बज्यो । बाहिर निस्केँ, जुझारू पार्टीका नेता, उम्मेदवार तथा कार्यकर्ताहरू स्वागत गर्न बसेका रहेछन । दश औँलाका समुहहरू अचानक एक हुँदै गए ।

“अधिकारी जी नमस्कार ।” मैले केही भन्न नपाउँदै अबिरले छोपिएको अनुहार अघि सार्दै उम्मेदवार मित्र अघि सरे ।

“हजुरको साहित्यप्रतिको अभिरूची मलाइ राम्ररी थाहा छ । म पनि धेर थोर साहित्यमा समय दिने गरेको छु, त्यहि अपनत्वको कारणले म हजुरकहाँ पनि आएको हुँ । यसपालि हामीलाई सम्झनुहोला ।”

“वरीपरीका सबै घरहरूमा हाम्रा प्रतिद्वन्दीहरूको झण्डा राखीएको रहेछ । हजुरको घरमा चाहिँ यो राखिदिनुहोला ।” मेरो हात तानेर झण्डा राखिदिँदै पार्टीका स्थानीय कार्यकर्ताले भने ।

“हामीलाई यहाँ प्रति पूर्ण विश्वास छ । हवस् त हामी आज यो क्षेत्रको घरदैलो कार्यक्रम भ्याउनुपर्ने छ ।” भन्दै गरमजोशका साथ हात मिलाउँदै सबै फर्के ।

भित्र पसेँ र फेरी कम्प्युटरको अगाडि बसेको मात्र के थिएँ कलबेल फेरी बज्यो । बाहिर हेर्दा देशको सबै भन्दा पुरानो पार्टीका उम्मेदवारहरू र कार्यकर्ता त्यही शैलीमा उभिएका रहेछन ।

“नमस्कार बाबु ।” उम्मेदवार अघि सरे । “बुबा कता हुनुहुन्छ कुन्नी । बुबाले त मलाइ राम्ररी चिन्नुहुन्छ । अनि बाबु पनि मेरी छोरीको सहपाठी हुनुहुँदो रहेछ । छोरीले बेला बेलामा कुरा गर्छे । यस पटक चाहिँ हामीलाई सम्झनुहोला ।”

“घरमा झण्डा राख्नुभएको रहेनछ । मलाइ पक्का थाहा छ त्यो ठाउँ हाम्रै झण्डाको लागि हो ।” हातमा झण्डा राखिदिँदै कार्यकर्ता लगायत सबै बिदा भए ।

भित्र फर्केँ अघि झण्डा राखेको ठाउँमा त्यो झण्डा पनि राखेर फेरी कम्प्युटरमा बसेँ । विषयवस्तु फुरे झैँ भान भयो लेख्न लागेको मात्र के थिएँ फेरी कलबेल बज्यो ।

बाहिर अर्को ठुलो पार्टीका उम्मेदवार तथा कार्यकर्ताहरू त्यसरी नै उभिएका थिए ।

“हजुर पनि यसो निस्कने हैन त हामीसँग,” उम्मेदवारले सम्बन्ध जोडे “हजुर हाम्रो सम्बन्धलाइ यसपालि त अझ गाढा बनाउनु पर्छ ।”

“घरमाथि यो झण्डा है त ।” कार्यकर्ताले झण्डा हातमा राखिदिए र केही भन्न नपाउँदै सबै फर्के ।

भित्र पसेँ र सबै झण्डाहरू नियालेँ । केही बेर पछि दराज भित्रबाट सूर्य चन्द्र अङ्कित राष्ट्रीय झण्डा निकालेर भऱ्याङ चढेँ ।

२०७० कार्तिक २३ गते, शनिबार

एकदेव अधिकारी

  •  
  •  
  •  
  •  
  •  
  •  
  •  

1 thought on “झण्डा (लघुकथा)”

Leave a Reply

Your email address will not be published. Required fields are marked *