किन ?

उदास छ दिन पनि निरास छ यो रात किन
दर्द छ मुस्कानमा छ कपट सब बात किन
झुटो भनुँ म कसलाई साँचो यहाँ को छ र
अविश्वासमा जेलिएको छ यहाँ हरेक साथ किन

जो चोर हो उही भन्छ म साधु हुँ म सन्त हुँ
अरु असत्य म सत्य हुँ शुरु हुँ म अन्त हुँ
उपकार गरे अपकार भई तोडिन्छन ती हात किन
जो झुक्छ नम्र भई सधैँ फोडिन्छन ती माथ किन

रंगिएको छ जो यहाँ निर्दोषको रगतले
उसैलाई बुद्ध भनी पुज्छ यहाँ जगतले
झस्कन्छु त्यसै त्यसै म हल्लिदा नि पात किन
म ठूलो हुँ तँ नीच होस् अनेक थरी छन् जात किन

उज्यालो लिई घुमें जगत भेटिन प्रेम कतै पनि
देखिन शिव बुद्ध कृष्ण ईशा राम कतैपनि
मारकाट सबैतिर छ रक्तपात यहाँ किन
छैन शान्ति चित्कार मात्र छ खात खात यहाँ किन ।