तिमी जस्तो म

तिमी जस्तो म,म जस्तो तिमी हुन सक्दैनौ
अशान्तिमा आपसको मनमेटाव धुन सक्दैनौ
कि वारि कि त पारी भएको जाती हुन्थ्यो
मझधारमा रुमलिई हाँस्न अनि रुन सक्दैनौ ।।१।।

जस्ले देख्यो नराम्रो उसलाई भन्नु केही छैन
जस्तो बोल्यो त्यस्तै बोल्ने कदापि बन्नु छैन
ज्ञात नभएको हैन परिन्छ कुनै दिन आफै
जानाजानी पुर्न नसकिने खाडल खन्नु छैन ।।२।।

जे अरुसँग भयो मसँग होला विश्वास गरिन मैले
आश्र्चयमा परे धेरै अह हृदय मरुभूमिले भरिन मैले
जस्को बुद्धिले जति भ्याउँछ त्यतिनै गर्दो रैछ भनी
आफ्नो चित्त बुझाए तर कदापि दागा धरिन मैले ।।३।।