त्यो चोक जस्तै चोक यहाँ पनि छ साथी

त्यो चोक जस्तै चोक यहाँ पनि छ साथी
फुटानीहरु साटीन्छन यहा पनि
गफका पर्राहरु भुटुटु पडकिन्छन यहाँ पनि
चियाका गिलासहरु ग्यास्ट्रिकमा साटेर
मधुशालामा योजनाहरु बन्छन यहा पनि
फरक यति छ तिमि यहाँ छैनौ
म तिमि संग छैन साथी
त्यो चोक जस्तै चोक यहाँ पनि छ साथी

लक्ष्मी पुजेर लक्ष्मीहरु खोजिन्छ यहाँ पनि
दियो बालेर दियो पुजिन्छ यहाँ पनि
कसैको खुसीमा इर्श्याहरु पालेर
मनहरु खुम्चिनछन् यहाँ पनि
त्यहा जस्तै नाना थरि भान्सा चुलो को
रिति थितीको उंच निचको कुरा गरिन्छ यहा पनि
घर भत्केको र सिमा टुटेको कथा बन्छ यहाँ पनि
भाँडाहरु ठटाएर पाहुना तर्साइञ्छ यहा पनि
फरक यति छ
तिमि यहा छैनौ
अनि तिमि संग म छैन साथी
त्यो चोक जस्तै चोक यहाँ पनि छ साथी

कहिले कहिँ आमाको फरिया गनाउदा
माटो सम्झिन्छ मनले साथी
साँझ बिहान रात यहा पनि आउँछ साथी
भक्कानिएर यो मुटु भरि देश उम्लिन्छ साथी
मधुशालामा एक्लै हुँदा साथ सम्झन्छ मनले साथी
हिड्दा ठेस लाग्यो भने बाटो सम्झन्छ मनले साथी
गर्मि उस्तै छ जाडो उस्तै छ
फरक यति छ तिमि यहाँ छैनौ
अनि म त्यहा छैन साथी

चुराहरु चोइटीएर यता पनि फुटछन्
अनि आँशुहरु पग्लिएर यता पनि बग्छन साथी
विरहका गीतहरु यहाँ पनि गाइन्छ
खुसीका रीतहरु यहा पनि मनाइन्छ साथी
आमालाई सम्झंदा चन्द्र सुर्य त्यो उचालेर
गर्वले उठाइन्छ काँध माथी साथी
सबै थोक भएर पनि फरक छ
किनकि तिमि यहा छैनौ अनि म त्यहाँ छैन साथी
दुखेका मनहरु माझेर धोई पखाली गरिन्छ यहाँ पनि साथी
त्यहा जे छ सबै छ
फरक यतिनै छ तिमि यहा छैनौ
अनि म त्यहा छैन साथी
त्यो चोक जस्तै चोक यहाँ पनि छ साथी

कहिले कहिँ त्यहाको माटो बोकेर
एक दुइ थान यता आउदा
देशै आए जस्तो हुन्छ साथी
मन कुढ़ीन्छ छाती भरि
दिक्क थपिन्छ मनभरी साथी
सबै सबै उस्तै भए पनि
त्यो चोकमा सबै देश भेटिन्छ
अनि कहिले कहिँ यो चोकमा
एक मुठी देश भेट्दा मन गदगद हुन्छ साथी
साच्चै फरक चै के भने
तिमि यहा छैनौ अनि म त्यहाँ छैन साथी
त्यो चोक जस्तै चोक यहाँ पनि छ साथी

यो चोकमा पनि लेनदेनका कुरा हुन्छन
घर घडेरीका मोल मोलाइका
भाउ बढेका प्रशस्त कुराहरु हुन्छन साथी
हिसाब कितावका बात हुन्छन
ठेक्का पट्टा पछिका घात हुन्छन
तगादा र असुलीको रिले रेसमा
साँझ बिहान दिन अनि रात बित्छन साथी
मलिन मनका दुख :हरु
भट्टीमा यहाँ पनि साटिनछन् साथी
सबै उस्तै उस्तै छ साथी
फरक यति हो तिमि यहाँ छैनौ
अनि म त्यहाँ छैन साथी
त्यो चोक जस्तै चोक यहाँ पनि छ साथी

कोही चढ्यो भने झार्ने खेल राम्रो खेलिन्छ साथी
कोही बढ्यो भने तान्ने झेल राम्रो गरिन्छ साथी
त्यहि जस्तै राम्रो होइन हाम्रो छानिन्छ यहाँ पनि साथी
टम टमलाई पट्टि यहा पनि लाइन्छ साथी
गुलियोलाई तितो भन्ने चलन नै छ साथी
बाङ्गो रुखलाई यहाँ पनि त्यहि जस्तै
सिधा मानिन्छ साथी
सबै उस्तै उस्तै छ
फरक छ एकै थोक
तिमि यहाँ छैनौ
अनि म त्यहा छैन साथी
त्यो चोक जस्तै चोक यहाँ पनि छ साथी !!
=====================
srdhakal