आऊ नयाँ वर्ष खुलेर आऊ
नेपालमा शान्ति दिगो बनाऊ
दिक्दारिये आज स्वदेशवासी
छर्दै खुसी जीवन ती सजाऊ
सद्भावको दीपक बाल झल्ल
संकष्ट जे जे छ सबै हटाऊ
नेटो कटाऊ पिर,ताप,बाधा
सन्तुष्टि बाँडेर सधैंँ हँसाऊ
दुर्भावका बोट उखेल चाँडै
सद्प्रेम फुल्ने विरुवा लगाऊ
आक्रान्त भो देश विपत्तिबाट
सन्ताप हर्ने सरिता बहाऊ
वर्षा गराऊ शुभकामनाको
सम्पूर्णमा ‘कोमलता’ बढाऊ
(छन्द:- इन्द्रवज्रा )
५ अक्षरमा विश्राम
-कोमल भट्ट
पुरानो नैकाप,काठमाडौँ
हाल:-न्युयोर्क,अमेरिका