जात र धर्म समान सबै के हिन्दू इसाई
छ सानो छानो मिलेर बसौं को छ र पराई ?
कुरान–वेद–त्रिपिटक् सारा ज्ञानका ती ज्योति
गौतम –महा–जिसिस–गुरु विश्वका यी मोती ।
अनेक जात अनेक धर्म हो साझा फूलवारी
शान्तिका दुत विगुल फुकौं क्षितिज त्यो पारी
सृष्टिको रच्ना मानव हामी मानवता धर्म
‘बाँच र बाँच्न देऊ’ है सबै मानवको मर्म
पहाड ढल्छ मधेश रुँदा हिमाल पग्लन्छ
हिमाल गले पहाड फुटे मधेश काँ हुन्छ ?
के भो र छैन महल सिसा खुला यो आकास
स्वर्गका धनी अभाव छैन गास र कपास
हटाऊ सारा मनको मैलो जात र भातको
ममता भर सुभाष छर जननी थातको ।
मधेशी कोही पहाडी कोही कोही छन् हिमाली
भाषा र भेष पृथक होला हामी हौं नेपाली