बिना कसुर दोषी बनाई बोली बार्यो निष्ठुरीले
अजम्बरी साइनो तोडी जिउँदै मार्यो निष्ठुरीले
विश्वासको दियो किन निभ्यो कारण सोधिरहें
अनेक झुटो बहानामा मलाई टार्यो निष्ठुरीले
जीवन भरको साथ माग्यो सुम्पिदिएँ जिन्दगानी
विश्वास घातको झटारोले खुशी झार्यो निष्ठुरीले
प्रीति फुलाउन मनको घडेरीमा बास दिएँ
कोपिलामै निमोठेर बस्ती सार्यो निष्ठुरीले
घाइते मुटु दुखाएर पीडा दिँदै ‘जिज्ञाशु’लाई
दोबाटोमा साथ छोडी एक्लो पार्यो निष्ठुरीले
कल्पना पौडेल ‘ जिज्ञासु ”
गैडाकोट ४ नवलपरासी
हाल = इजरायल