नयाँ परिवेशको दृश्य उसलाई अचम्म लाग्यो।
अलग्गै देखिने त्यो अण्डालाई कुखुरीले निकै यत्नका साथ कोरलेकी थिई।
उसको अपेक्षा विपरित त्यो चल्लो अन्य चल्लाहरू भन्दा अलग निक्लेको थियो।
आमाको माया थियो – उसलाई अरू चल्लाहरूसँगै हुर्काई, बढाई, आफ्नै रहन-सहन, चालढाल सिकाई – चतुर थियो सिक्दै गयो। उसले कुखुरीलाई आफ्नै आमा मान्न थाल्यो, र अरू चल्लाहरू, आफ्नै दाजु-भाइ।
समय परिवर्तनको वेगले उसलाई पनि हुत्याउँदै लग्यो, थचार्दै, पछार्दै लछार्दै लग्यो र अहिले ऊ बिबिधताले भरिएको क्षेत्रमा पुग्यो। त्यहाँ ऊ जस्तै देखिने, उसका दाजु-भाइहरू जस्तै देखिने, अनि ऊ तथा उसका दाजु-भाइ भन्दा अलग देखिने जीवहरूको संसारमा पुग्यो।
अनि उसलाई यो नयाँ परिवेशको चाल-चलन अचम्म लाग्न थाल्यो।
अहिले ऊ आफू जस्तै देखिने एउटा चल्लोको बोली-चाली चाल-ढाल देखेर एक्लै पेट मिची-मिची मुर्छा परी-परी हाँस्दै छ।
२०७४ आश्वीन २५