Skip to content

कोर्सि दोजि रुम्जाटार (नियात्रा)

20180520_ArjunBahadurTamang-01


घुमिफिरी रुम्जाटार…. बिबा ताम जत्तुगुहेन्से थेबा मुबा । चुपाल्से थेरि दोमेङबा संयोग ताजि । प्रेस काउन्सिल नेपालसे निबा नाम्दुङ २ कुनु ल्हाम तय लामुबा । काउन्सिलला बिधागत पत्रकारिता उप–समितिला संयोजक चेतनाथ धमलासे ल्हाम संयोजन लास्युमुबा । स्ह्योला ८ बजे गौसालासे ल्हाम तिबा मुबा । याम्बुग्याम्से खोपाङ, बोंदि ताबान सिन्धुली–खुरकोट, उदयपुर थुरबान ओखलढुंगा २ सय १९ किलोमीटर रुम्जाटाररि म्हुन दोपरि दोजि, ङानिकादे । याम्बु न्हाङला कंक्रिट सहर थेला धुलो आसेम गाडीला म्युखुसे आक्रान्त ताबा सेम याम्बु ख्लाबातेन चङ्गा ताजि । ल्हामरि ह्रेङबा दुइहेन्से ग्योइकाइ स्योस्यो तेबा रोचक घिमिरे हेन्से म्हेन्दो सोम च्युइ ङा मुबाला ।

जत्तुगुहेन्से ङा कोर्बा सेम ताबा म्हि हिन्ना । जाजामा नाम्सा कोर्बा बिसि आपासे ‘चुसे कि ताम बाला, कि ह्याम बाला’ बिसि क्रिङस्युमुबा । याम्बुरि खासिनून खाइमा ग्यागरदानरि खाइमा गोसाइकुन्ड खाइमा महाबोधि विहार इन्डिया कोर्बा लामुबा । चुराङले कोर्सि छार ग्ला ङोसेबा थेन थेरिला परिवेश आसेम वातावरण गोम्याङबा हिन्ना । दुई दुइरि ताबा गेताङसे लासिनून ङाइ कोर्बा अवसर याङबा हिन्ना । ल्होलो ल्होलो ग्लाला परिवेशसे लासि तिलाई ताम लोप्पारि ङादा सजिलो ताबा हिन्ना । तुलनात्मक रुपरि विकासला पूर्वाधारनोन अवलोकन लाम्याङबा हिन्ना । निबा ग्लाला ऐतिहासिकता मि था आयाङबा तामनून आतानि । सामाजिक सदभाव थेन साँस्कृतिक पक्षनोन तिलाई गोबारि याङबा हिन्ना । थे ताबासेनून ङा कोर्बा अवसर याङजिकि आनिना आपुइबा मुला । ङानितेन ल्हामरि रुम्जाटारला ङाच्छाला गाविस चोहो सिताराम गुरुङ मुबा । सिन्धुली सितलपाटि दोसि क्यार्से च्यामा रामेछापला ब्ले म्राङजि । पिङगाइ तिलाई आम्राङबा मुबा । ङा ककनिला पिङगाइ हृङामरि छार्वासे लामानून सुक्खा ब्ले म्राङसि उराठ सेम ताजि । प्रकृतिसेनोन लेबाफेबा लाबाह्राङ छोर्जि । सुनकोसि गान्दिलातिर तामाकोसि ताबान घुर्मिग्याम्से तोर खान्डो ग्याम तिजि । राष्ट्रिय गान ह्वाइला रचनाकार व्याकुल माइलाला दिम नाम्सा हिलेपानी, थाक्ले ग्याम ताबान मानेभञ्ज्याङ दोसि तामाङ नाम्सा केत्तुके वाइसि रुम्जाटार दोबा हिन्ना । व्याकुलला दिम नाम्सा थासि थाक्ले दोबा दुइरि याम्बुरि मुबा ओखलढुंगा उबुँला ह्रो पत्रकार कमलराज राई टेलिभिजनला गजुरधन राई थेन गणेश राइदा डान्सि फोन लाजि । कमलसे फोनरि पाङजि ङादान था आपिन्न खुसुक्क प्राबा !

न्यासे म्हुनाङ ७:३० रि पद्मा मेडिकलला सङ्गारि खादासे ङानि छाङमानदा डेन लाजि । न्हाङगारदाङसे स्ह्योला ७ बजे चियापान लासि रुम्जाटार नाम्सा कोर्बा ताजि । थेरिला दिमकादे ङाला नाम्साला बिमाइनोन जत्तुगु छोर्जि । बार्दलि तेबाला ताबा तासाइनोन ओन्बादा सोला लागिरी स्होबाह्राङ छोर्जि । ग्ला परिवेश अन्सारला दिम मुबा । जेबा चिटिक्क मुबा, दिमकादे । ग्योइकाइला थुमरि ऐतिहासिक फडको क्लाङबा सा हिन्ना, ओखलढुंगा । रुम्जाटारनून थारेङ थान्बारि आतासेदा ग्ला हिन्ना । गुरुङ ह्युल्बाला घना बस्ती पूर्वेलि गुरुङला थातथलो हिन्बाचिम, रुम्जाटार । ल्हानान म्हिकादे लाहुरे तासि फिरक्याप ह्युलथेन याम्बुरि मुसाइनोन बसाइँ लेबाला आरेबा चिम । दिम सुङबा म्हि आरेसाइनून ताल्चा ठोक्सि थान्बा मुबा । खाप्पाइबिमा ङाच्छारि बौद्ध धर्मला प्रचारक सन्त दिलदाससे ग्योइकाइ तिबाला चिम । धर्म प्रचार लास्युवा दुइरि श्लोक शैलीरि ग्योइकाइ अभियान लास्युवा मुबा । नाम्सा गुङरि मुबा दिलदासला शालिक मुबाला । थेला ऐतिहासिक व्याख्या सिताराम गुरुङ थेन चेतनाथ धमलासे ङानिदा लास्युजि । ‘कोदाको पिठो निरगुनको दाउन, गुरुङले गरे धर्म र कर्म छक्क परे बाहुन’ बिबा जागरणला ताम शिलोकग्याम्से दिलदाससे सुङबा मुबाचिम । स्ह्योरि थे नाम्साला सामाजिक सदभावला वातावरण गोबारि याङजि । प्रदेश १ ला ङाज्याङ गुम्बा स्होसि जिन्गे लाबाला मुबा । फिरक्याप ह्युलरि मुबा थे नाम्साला लाहुरेकादेशे पुइखाबा टाङा, संसदकोष थेन बौद्ध दर्शन तथा गुम्बा विकास समिति पुल्चोकसे पिन्बा टाङा लासि करिब करोड डु ५० लाखला अनुमानित बजेटसे स्होसेदा हिन्बा चिम । थेला लागिरी रुम्जाटार बौद्ध गुम्बा फाउन्डेसन बिसि समिति स्हेङसि सकृय लाजीवा मुला । ङानितेन याम्बुहेन्से छ्याम मुबा सिताराम गुरुङ थे समितिरि गाउराइ मुबाचिम । नाम्साफिरि गोर्कि चाउतारा मुबा जिम । तिलाई रे ङाच्छारि थाबाला पिपलदोङला गाङसाल चेक्खेन मुबाजिम । थे दोङथेन जागरण गेताङला दोङराप थुइबाला जिम । जागरुक समूह राल्फालिला म्हेन्दो गिक निनु चापागाईंसे चाउतारारि स्ह्युसि ङानि छाङमानदा सुङजि, ‘राल्फाली अभियानला ताङरि चुरि दोखासि ङानिकादे ह्वाइग्याम्से ह्युल्बादा छोर्वा पिन्बान लाजीवा दुइरि पञ्चायति हिमायतिकादेशे फुन्टि थिना लासि स्युर्जि ।’ हिन्बाम ह्युलरि निरंकुश शासन लाजीवा मुबा, थे दुइला शासकसे । रुम्जाटार एअरपोटरि च्याङना यात्रु ताबासे प्लेन आफ्याङबा ल्हानान ताजिम । सुनसान एअरपोटरि ङानि छाङमान दोजि । थेरि ल्हाना ह्राङबासे फोटो किन्बा लाजि । थेलिच्छा दोसिन मेडिकल हलरि छाङमान तोसि खाजि । थेरि दोखामा स्ह्योला कान तयारी ताजिन्बा मुबा । याम्बागि आराम लासि छाङमान कान चाबारि वाङजि भान्सा कोठारि ।

दिनिला १२ बजेरि थेरिन मुबा सभाहलरि गेताङ तिजि । औपचारिक गेताङला ग्रेनडोन्बो रोचक घिमिरे मुबा । प्रेस काउन्सिल नेपालला विधागत पत्रकारिता उपसमितिला संयोजक चेतनाथ धमलाला चोहोदानरि ताबा गेताङ तिबा हिन्ना । नेपाल पत्रकार महासंघ ओखलढुंगाला चोहो शिवराज ढुङ्गानासे डेन लाबा गेताङला थुमरि काउन्सिलला मुख्य अभिकृत झविन्द्र भुषालसे गेताङ औचित्य प्रष्ट लास्युवा मुबा । ‘साहित्यिक पत्रकारिताको अवस्था’ विषयक विचार विमर्श तथा ओखलढुङ्गा परिदर्शन बिसि स्हेङबाला थे गेताङरि ओखलढुङ्गामा साहित्यिक पत्रकारिता बिबा थुमरि थेनून जोङला गोरखापत्ररि पत्रकारिता लास्युवा नाराद गौतमसे कार्यपत्र थान्स्युजि । कार्यपत्ररि बरिस्ठ साहित्यकार श्रीओम श्रेष्ठ ‘रोदन’ थेन थेनून जोङला तुलसिहरि कोइरालासे टिप्पणी लास्युजि । सहभागि ग्याम्से विष्णु भण्डारि, अशोक सुवेदि, सिताराम गुरुङ, होमशङ्कर बास्तोला, विजयकृष्ण पोखरेल, उमा गुरुङसे कार्यपत्र थोरि ह्राङला ल्हेङमो थान्स्युजि । डोन्बोकादे प्रेस काउन्सिल मुल्मि गोविन्द चौंलागाइ, ईश्वरि ओझा, सिडिओ जनकराज पन्त, सिद्दिचरण नगरपालिका उपप्रमुख इच्छाकुमारि गुरुङ, नेपाल साहित्यिक पत्रकार संघला ह्रोचोहो लक्ष्मी उप्रेतीसे ह्राङ ह्राङला ल्हेङमो थान्स्युवा मुबा । चु गेताङ थुम्बा लगत्तै ङिछा सत्रला ह्वाइखा वाचन गेताङ तिबा मुबा ।

रुम्जाटारला लामागाउँ बिबा नाम्सारि ताबा गेताङरि लोप्खाङला लोप्बोन, लोप्खेन्पो (माष्टर) थेन नाम्साबाकादे आतुर मुबा । ताले पाङसाम ह्वाइखा पाङबा नेन्बा लाबारि थेनि चेक्खेन आताना ङानिनून मुबाला । नेपाल साहित्यिक पत्रकार संघला चोहो नगेन्द्रराज शर्माला चोहोदानरि ताबा ह्वाइखा वाचन गेताङरि ग्रेनडोन्बो माक्र्सवादि सौंन्दर्यशास्त्री निनु चापागाईं मुबाला । थेरिला स्थानीय थेन याम्बुसे निबादुगुसे ह्वाइखा वाचन लास्युवा मुबा । कृतिका गुरुङ, अशोक सुवेदि, कृष्णाकुमारि गजमेर, विष्णु भण्डारि, अञ्जु भुजेल, कला अनुरागी, दुर्गालक्ष्मी गुरुङ, ज्ञानुवाकर पौडेल, प्रतिष्ठा दाहाल, रामप्रसाद पन्त, उदयराज न्यौपाने, केदारप्रसाद बाँस्कोटा थाक्ले, डा. बिएन मायालु, लक्ष्मी रुम्बा, निर्भिक गुरुङ, नवराज पुडासैनी ज्योत्सना, दुर्गा सुब्बा, होमशंकर बाँस्तोला, विकास राइ, प्रसिद्धा शर्मा, रोहित गुरुङ, माधवप्रसाद पोखरेल गोज्याङ्ग्रे, अशोक दाहाल, कुशल अर्याल, निकिता दाहाल, अर्जुनबहादुर तामाङ, जयदेव भट्टराई, सुमन पुडासैनि, सिताराम गुरुङ, पदम राइ, लक्ष्मी भट्टराई, त्रिपुरा पौडेल, चेतनाथ धमला, रोचक घिमिरे थेन तुलसिहरि कोइरालासे ह्राङ ह्राङला रचना वाचन लास्युवा मुबा । वाचित रचना थोरि डोन्बो घिमिरे, निबन्धकार युवराज नयाँघरे थेन ग्रेनडोन्बो चापागाईंसे समिक्षात्मक ल्हेङमो थान्स्युवा मुबा । थेकुनुला दुई गेताङसे लासि थुम्जि । गेताङ जिन्मा नेसे ताजिन्बा मुबा । नेसेरि तिलाई ह्रोसे साङाला छ्युकु माइसि थुङबा ताम ताजि । कला अनुरागी, विष्णु भण्डारि थेन ङा साङा माइबारि निजि । जा जागार थुङसि कान चाबारि वाङजि । कान चासि लिच्छा श्रीओम श्रेष्ठ ‘रोदन’से याम्बुरि दिमरि बाबारि थान्बा आइराक बोलासि स्याबारि वाङजि । थेला तालरि ङानिनून स्याजि । स्याबासे लामा म्हुनाङला ११ बज्तिजि । न्हाङगार स्ह्योरि ७ बजे गाडी ओखलढुङ्गा प्रासेदा सूचना था याङसि म्हेबारि ह्राङ ह्राङला तिसारि निजि ।

आइतबार स्ह्योरि चिया बिस्कुट लासि ७ बजेरि लामागाउँ रुम्जाटार ङानिसे ख्लाजि । ङानिला ल्हाम सिद्दिचरण नगरपालिका गेदिमला डेनरि ओखलढुंगारि ताजि । मेएर मोहनकृष्ण श्रेष्ठसे ओखलढुंगा बजारला ऐतिहासिकता थेन कवि सिद्दिचरणला थुमरि जानकारी पिन्स्युजि । थे बजार म्राङसि ङाइ ङाला जोङरि मुबा पुरानो त्रिशुलि बजार थुमडान्जि । थेरि ह्राङनून सडक ग्याम आरेबा साँगुरो । हिन्बाम सडक यातायात खाबा ङाच्छाला बजार तासिनून हिन्ना । तत्कालीन भिम मल्ल ग्लेला दुइरि स्यार थुमरि राज्य बिस्तार लाबा मुबा । थे दुइरि निबा सेनादुगुसे चाबाला लागिरी नाम्सासे सुन ह्रापह्रुप लाबा मुबा । थे सुन युङबारि ओखल स्होसि तोबा लाबामुबा । थे युङबादा ओखल ढुंगा पाङना पाङनान जोङला मीन चिबा बिसि पाङसि खाबाचिम । ओखल मुबा युङबादा संरक्षण लासि थान्बालचिम । थेङामरि चिसि छाङमानसे फोटो किन्जि । थेलिच्छा मेरो प्यारो ओखलढुंगा… बिसि ह्वाइखा ब्रिस्युवा सिद्दिचरणला मिनरि मुबा पार्करि कोर्जि । थेदुइरि नगरप्रमुख श्रेष्ठसे सिद्दिचरणसे ब्रिबा ह्वाइखाह्राङलेन छाङमानला प्यारो ओखलढुंगा स्होसेदा सुङिज । विकास समृद्धिला अवधारणा स्हेङजिन्बा बिसि प्रमुखसे सुङजि । ह्वाइखारि डोबा ओखलढुंगा बजाररि मुबा सिद्दिचरणला सालिकदिरि चिसि फोटो किन्बारि खाला खाम्बा ङाच्छा विवाह्राङ नोन ताजि ।

१०:३० रि होटलरि कान चासि नगरपालिका गेदिमरि बिदाइ गेताङ मुबाला । नगरप्रमुख श्रेठ थेन उपप्रमुख गुरुङसे ङानि छाङमानदा खादा ग्याम्से डेन लाबान ङोसेबा आदान प्रदान लाजि । थेरि ह्रापह्रुप ताबा छाङमानसे ह्राङ ह्राङला ङोसेबा पिन्बा किन्बा लाजि । थेलिच्छा याम्बु तोबादा बस तयारी मुबाला । रुम्जाटार ओखलढुंगाला सेमन्हाङरि आम्लेबा माया थोसि याम्बुरि तोजि । नेसेला ८ बजे गौसालारि फापजि । छाङमान ह्राङ ह्राङला चिबा ग्लारि निबादा थेरिन फेसि ङा डेरारि दोखाजि ।

अर्जुनबहादर तामाङ

Leave a Reply

Your email address will not be published. Required fields are marked *