दिङ दाङसे दासाइ खाबा निबा लामुला। खाइमाहेन्से दाङबा बिबाजा दुई था आतानि। ङाइ डान्माहेन्से दासाइरि नाम्साबा जोम्सि कालाङ होपदोनाला वातिरि क्योङनोन रुप तामुबा। तोङबाखोरला मेमे, होपखोरला मेमे थेन एक्ले मेमे थेन ब्राना ब्रानान ङाइएन जाजागि ताम गोजी।
बार्खानाङ सुन साङा सुबा गे लासि ब्लाप्सि सिदाम्बाला नाम्साबाला स्ह्याल दासाइ लिच्छा ह्याल ह्याल तामुबा। नाम्सारि रा मे छाबा कोलामाएन लोप्खाङ निबा दुइरि पाकपोक छोसि ङोआसेबा ह्राङबा दोमुबा। थे क्योङनोन ताबा कारनजा दासाइला मुइला स्यासे हिन्बा चिम। ङाइ डान्मा दुइरि दिङरि न्हिराम जाँच तामुबा। जेठ थेन मंसिररि। जेठला जाँच जिन्बाहेन्से बर्खे बिदा तामुबा। दान्दे डान्मा मि बर्खारि गे लाबारि छुटि पिन्बा ह्राङबा चिम। आपा आमा थेन आज्यो आले थेन डिक्सि गे लातोबा।
खाम्बा गे खाज्युवाइ तासाइ लातोबा। नाङबा निसि खित फाबारिएन नितोबा। बु ह्वारि ख्वाबा, मोइबा लाना लानान बार्खा जिन्सि दासाइ खामुबा। वैशाखरि डाबाला माकाइ साउनरि मिन्बा लिच्छा माकाइला काङबाला कानसे दासाइ लिच्छा ख्लामुुबा। म्ल्हाला कान चाबारिएन दासाइ नोन खातोबा मुबा। छारक्वानमि ओराङबान हिन्ना। फोनाङ चाबा थेन गोनाङ क्वान्बा छ्योबाजा दासाइरिन मुबा।
असोजरि दासाइ परतिसाम स्याकान चाबान बुरि सुनला म्रा स्योत्तोबा मुबा। असोज थाल्साम तिगाइ लाआतोबा क्याम्साङ जासाम कोर्सि ब्राजी। नाम्सा दाङसेन हुन्दालिङ जुबा चलन मुबा। ङाइ डान्माजा खहरे नाम्सा थेन कुसुवा नाम्सारि जेक्खेन चर्केपिङ जुमुबा। तिनी न्हाङगारमि थेह्राङबा पिङ म्हासि निजि। याम्बुला भृकुटिमन्डपरि जेक्खेन मेसिनला पिङ चुरि बिजुलीसे हुइमुला। नाम्सारि म्हिसेन ल्याक्पासे छेक्सि छेक्सि हुइतोबा। दासाइ थेन तिवार लिच्छा हुन्दिलिङ प्लोक्सि थान्तोमुबा। साल्गिला छोदा ख्रिम्सि जुबाला हुन्दलिङजा हरिसयनि एकादसि दोना रिल्सि थान्मुबा। एकादसि लिच्छाजा स्युसि थान्बा लामुबा। हुन्दलिङ जुसि क्लाङसि ताङबारिएन दासाइ नोन खातोबा। हुन्दलिङ क्लाङसिन खाहारे नाम्साला बोम्बो पाराङला छिक्मा क्युइसि। खोरा दोजि। थेलिच्छा थेला मिन पोजि। मिन थान्जि हेलिकेप्टर बोम्बो।
हुन्दलिङ क्लाङबा निउ लासि छामे ब्योन रुप ताबा चलन मुबा। ङान्सेएन थारेङ थारेङला सोल्टिनिला केम म्ह्याङजि। थेनिसे साङाला आइराक, तितेमारि थेन चाम्रे कान बामुबा। ङान्सेजा रुमाल पोरे देप्मुबा। पोरेरि ल्वाङ सुपारि थेन कटकटे मिठाइ तामुबा। खालाई खालाइसेजा हिरो हिरोनिला पोस्टकार्ड पिन्मुबा। पोस्टकाडएरि सायरि ब्रिबा चलन मुबा। सेमनिबा म्हिदा पिन्बा पोस्टकार्डरि माया प्रेमला सायरि ब्रितामुबा।
सानोमा सानो मृगको पाठो
म एक्लै छेक्दैछु।
अधेंरी रातमा
कोही छैन समाथमा
यो पत्र लेख्दैछु।
चुह्राङबान सायरि ब्रिसिन ङान्ला ह्रोमासे सेम ह्रो दाम्मुबा। जेठ हेन्से फेबाला सेम ह्रोदा रुप ताबारिन दासाइ नोन ख्रुङतोमुबा। दासाइला रे दाङसेला दैनिकी ब्रिसि बोर्तोबा होमवर्क तामुबा। ङाइजा फुल्पाति हेन्से टीकाकुनु दोनाला तिराम नोन ब्रिसि हुन्मुबा।
खाइ थे दुई डान्सि खाबा माम विवाह्राङ दान्दे मि म्हाङ दोसि जिन्जिम। दासाइ खाजि। निजि। जिन्जि। ख्यात्पा डोबा बिसि नाम्सा ख्लाबा स्कुले ह्रोमा सहररिन लासि चिजि ताला। खालाई दोसि खाबा ह्राङ आछोर्नि। जाजागि टाङगा सोबाला लागिरी अरबरिक्यार फ्याङबा छामे ब्योनसेएन नाम्सा ख्लाजि। खाइमा खाबा। खाइमा दोबा। थेनिमादान था आताबा चिम। फोनाङ चाबा थेन गोनाङ क्वान्बारि जाकि ज्याना लासि तालावा बिसि इटहरि धरान ग्यागारदान फाप्माहेन्से ओन्माह्राङ खान्डो क्रेबा आम्राङनि। याम्बुरि निबाकादेशेम थेन दुइरि गाडी आस्याप्बा थेन पिलेन आस्याप्बा बिसि नाम्सादा फ्लिक दोसि आच्याबा चिम। नाम्सा दिममि कोला छार्सि ख्लाबाला जाङ ह्राङबा दोजिम। थारेङ थारेङ निबाला परदेशि सुताइ दासाइरिन नाम्सारि दोमुबा। तिवार लिच्छा मि नाम्सा दोसिन ओराङबाला ओराङबान।
बुरि सुन मिन्सि वाफ्युर ताबा दुइरि दोसिन नाम्सा ख्लासि ब्राबाला ताति तामुबा। अलैचि बगानरि चाबा थुङबा थुन्दा पोरे जाङसि ल्हारि क्रेबाला बथानएन ओराङबान तामुबा। चु क्योङनोन ताबारि म्राङबारिएन दासाइ नोन खातोबा मुबा।
दासाइ जिन्दाम्साइ स्कुल आठोङमुबा। नाम्साबासे जाजामे तिवार लिच्छा जेक्खेन स्कुल पुइबासे लासि। आछाम, डिमापुर, बाजिपाउ हेन्से साजि थेन काजिसे दिम थेमेला मिनरि चिठि पुइगाबामुबा। चुपाल्से खाबारि आम्याङजि। खाबा दासाइरिजा आसिसाम रुप ताला। नेग्युङएन ओराङनोन बिमुबा। तिग्युङनोन ओस्पान बिमुबा। चुपाल्सेएन ओराङबान चिठि खाजि। खाला दाम्मान रुप ताबारिएन दासाइ नोन खातोबा चिम।
ङाइ डान्मा ल्हानानसे गुरिङ दोगाला बिबारि आख्लासाइ चिठि पुइबारिजा खालाइसे ख्लाबा आरे।
खाज्युवाइ दासाइसे गोरगि मुइलाजा काल थोसि खामुबा। मुइला काल खासाइ चाबामालाजा दासाइ। दासाइ नोन मुइला काल। मुइला दसा। दान्देमि बोइलर नागा न्हासि थान्बासे खाइमा दाम्मान दासाइ। चाइ मान्जिकि। बोइलर नागाला काल खाजि। बोइलरला कालसे दासाइ रुङसि चिआतोनि। चाबासे चाजि। काबासे काजि। दासाइ खाबारिन आतोनि।
छारक्वान क्वान्बा। पोबा बिबाइ नोन दासाइ रुङसि चिआतोनि। दान्देमि छाङमानला यारि सेल्फि फोन। सेल्फि पुङजि। फेसबुकरि जाङजि। जिन्जि। ओइमा ओइमा ह्राङबा चिठिरि पोस्टकार्ड पुइतोबा दुई आरे दारेम। दासाइ ख्लाजि। सेल्फिसे। तिग्युङ नेग्युङला फोटो स्याजि। रेच्छागि। चुर्से थाजि। क्यार्से थाजि। जाजागि च्यार्जि। तार उर पिङगाइ छोङ फोर्जि। मेसेन्जररि हुर्जि। जिन्जि।
प्रिबा खाबा ङ्हाच्छान वादिग्याम थेन दिम साङसिङ लामुबा। तामुबा। प्राङ प्राङ दिनि फेमा। आमा दिनि फेजि। आमा दिनि प्राङ प्राङ बिबान जातुगु ताङमुबा। जातुकु ग्रेन तासि दिम ख्लाबा लिच्छा। खाल्से बिसाइ आमादिनि प्राङ प्राङ।
दासाइरि मुइ मामा थासि बोलासि दाङबारि ख्लाबान निजि दारेम। दार्सेला दुइरिमि सात्पा छेबा ख्लासि ल्होछार दाङबारि तिबामुला। तिग्युङ नेग्युङह्राङ खाबारि आम्याङनिएन बिआतोनि। बार्खाएन आरे। सेर्खाएन आरे। सेर्खारि खाबा ल्होछाररि क्योङनोन रुप ताबारि म्हाइसाइ ज्याबान तानाम। डान्सि डान्सि बामामि। बार्खाला डुइ थेन नाम्से लोङसि लोङसि दिम नाम्सारिक्यार दोबा बिमामि फेप्काउ क्योङनोन चु खाबा ल्होछाररि बिसाइ ताला। दासाइ बिसाइ ल्होछार बिसाइ खाच्युवाइ ह्युल्बादा डुइबा बिबा रिमठिम थेन प्रिबासेन हिन्बा चिम।
खिसि थान्बा। डुइसि ग्ला गिरिन पोप्पा मि प्रिबासेन हिन्बा चिम। गाङस्योङ थासि निबाला लाउरेदा दोसि बाबाला प्रिबासेन हिन्बा चिम। दिम ख्लासि थारेङ थारेङ दोसि चिबाला ह्युल्बादा फ्लिक दोसि खाना लाबाला प्रिबासेन मुबा चिम।
आरके जिम्बा ‘पूर्वेलि’