निबा डिसेम्बर १४–१६ रि दार्जिलिङला मिरिकरि दोमुबा । अन्तर्राष्ट्रिय तामाङ जोम्नारि बो किनम्याङजि । मिरिकरि जाम्बुलिङखोरला तामाङजुगु जोम्बा मुबा । आहाले पाङग्यालरि स्हेङबाला जोम्नासे छार समिति नोन स्होबाला मुला । खाबा ब्लिदिङ दोना दार्जिलिङला कै.एस. तितुङला चोहोदानरि स्हेङबाला कार्यसमितिसे गे लासेला मुला । चु जोम्ना ब्लिच्छा जोम्ना हिन्ना । क्योङनोन बिमा ङ्हाच्छा नेपालग्याम्से जोम्नादा तिबा हिन्ना । ङाइ बो किन्बाजा ङ्हाच्छारेम हिन्ना ।
जाम्बुलिङ खोरला तामाङजुगु ग्लागिकरि पोप तासि दाङबान खाबा थे ठिमदा चुपाल्सेएन ङ्हाच्छारि बोर्बा हिन्ना । तामाङ घेदुङला चोहोदानरि बोकिन्बा तामाङजुगुसे मिरिक प्लिङबा म्राङसि आउदिन सेम ताङजि । मिरिकला सिम्बा खाङबारि व्यवस्थापन थेन आयोजकला डेन्साङ बिसाम डोट खाबा थेन ब्रोइ खाबा छोर्जि । मिरक ख्लाबा ओदे दुई ताजिन्मुबा मुला । तासाइ थे ब्रोइ थेन डेनजा दान्देदोना म्लेबारि खाम्बा आरे ङाइ । छ्यो आछ्यो ग्यार्जा ङा तामाङ पोप्पाला थे जोम्नारि ल्हानान म्हि थेन रुप ताबारि म्याङजि । ङाइ डान्मामि ओदे ल्हाना तामाङमि ल्होछाररि जेक्खेन ह्रापह्रुप तामुबा । ह्राङ केबा ह्युल थेन दिमथेमेदा सोक ख्लासि जाम्बुलिङ खोररि ठाम्सि चिबाजुगुदा मिरिकसे पोप लाबारि खाम्जि । थे ताबासे मिरिक एदा डेन मुला । बिबा छिगसे आहिन डान्बा सेमसे ।
अन्तर्राष्ट्रिय तामाङ ह्वाइसे विवाह्राङ स्ह्यार ल्हो न्हुज्याङ खानादामान केसाइ ह्याङ तामाङ । जाम्बुलिङ खोरला खाज्युवाइ ग्लारि केसाइ ह्याङ तामाङ । ह्याङला गोइलो ह्याङला रिमठिम थेन ग्योइदा सोना लाबारि मिरिकसे बाङ लासि चिबाला चिम थे ताबासे मिरिक एदा डेन मुला ।
ह्याङलान पसुपतिनगर ग्याप्सेला हृदा मिरिक बिबाला चिम । हृन्हाङरि छ्याबाला साङसाङबा ग्योइरि क्याल्बान चिबाला मिरिक एदा ल्हानान ल्हानान डेनमुला । तामाङला म्हासि निलाबा ग्योइ थेन रिमठिमदा जागारगिक तासाइ तेन्बारि म्हाइबाकेन म्राङसि बिनोन तोला मिरिक एदा सलाम । डेन्साङ मुला मिरिकला तामाङदा । आमाग्योइ पाङबारि आँखाम्साइ गोइलोजे हिन्साइ तेन्सि थान्बा मिरिकला तामाङ थेमेदा थुजेछे । तोर छ्योङ मार ह्योङ तासाइ राज्यसत्ता थेन छेसि छेसि चिबाला मुला । ह्राङ केबा ह्युलरि सुताइ आमाग्योइ सोना लाबारि छेसि चितोबा मुला । चु ताम मिरिक एदा बिनोन तोला । ह्याङ तामाङ खाज्युवाइ ग्लारि केसाइ चिसाइ ह्याङला समस्या गिनोन चिम । अमेरिकारी चिसाइ दार्जिलिङरि चिसाइ । तेमालरिन चिसाइ ह्याङ तामाङमि तामाङ नोन हिन्ना ।
जेसाइ आनेसाइ तामाङसे गोइलो क्वान्बारि ख्लाबा आरे । आहा कादे जेबा डिहिला म्हेन्दो सार्बाह्राङ तामाङ ह्युल्बा । कोकोम्हेन्दो ह्राङबा चाङमा तामाङला गोइलो क्वान्बारि आहाले दोनाला र्यालि खालाइला मिग्याम दोप ताबारि आँखाम ताला । म्हिनोन म्हि म्राङबाला थे पिङगाइ हृसे ओ आस्याङ खाइमा खाबा बिसि ङ्योइसिन चिला ताला । सिम्बा सिम्बा लाबा थेन मिरिकसे तिङ न्हाङसेन डेन लाजि म्हान्बा मुला । ओन्छ्यान मिरिक गिक्खेन याखारगिक ङान्दान रुङसि चिबा मुला ताला । तुन्बा दुइरिन मिरिक एसे ङान्ला सेम डाजिम । मिरिक एदा सेमन्हाङसेन डान्मुला । आहाले पाङग्यालसे ङान्दान रुङसि चिबाला ताला । तामाङ दिमसेएन खाइ आस्याङ बिसि म्हाइला ताला । तिगा लासे ए थेन प्रे रुप ताजि । एला ग्यालाम एनोन ब्राउ । ङाला ग्यालाम ङानोन ब्राला । ए मुला फिरक्याप ह्युलरि । ङा मुला चु नाम्सारि ।
क्याम्साङ ताजि ए चिबा ग्ला । जासाम ताजि ङा चिबा ग्ला । तिग्युङ नेग्युङ ग्ले ठिमसे सीमाना स्हेङबा दुइरि एदा मेचि क्याम्साङ थान्जिम । ङानि मेचि जासाम नोन थान्जिम । डान्सि डान्सि सेम क्युङना लातोजि । एन्दा मि ममता बेनर्जि नानासे ज्याना लासिन च्याबा मुला ताला । तिगा लासाइ मिरिक तिङमाइ मिरिक ङान्से ह्रेन्जेनदोर्जेला कु स्हेङबारि म्याङबा आरे । एन्से चाउरास्तारि भानुभक्त म्हेमेदा थान्सि जिन्जिम । ङान्से सन्तविर म्हेमेला छ्योइ तेसि जुबारि म्याङबा आरे । एन्से रामायन डोसि जिन्बा चिम । ङानि सन्तविर म्हेमे जंगविर म्हेमे थेन बुद्धिमान म्हेमेदा म्होइजेन फुल्सि चिबाला मुला ।
तामाङ बिसि ङोसेना लामुला जंगविर म्हेमेसे थे ताबासे जंगविर म्हेमेदा फ्याफुल्ला ओम डेनमुला । ताम्बाला काइरन ब्रिस्युजि थेताबासे सन्तविर म्हेमेदा फ्याफुल्ला ओम डेन मुला । जिकतेन तामछ्योइ ब्रिस्युजि थेताबासे बुद्धिमान म्हेमेदा फ्याफुल्ला ओम डेन मुला । आँखाम डान्मुला । मिरिक दारेम एसेएन आझाइ सन्तविर थेन जंगविर म्हेमेजुगुदा डान्बारि लेङबा मुला । तामाङला थुम्सि निबाला रिमठिम ग्योइ थेन ग्योइकाइदा छार्ना ल्हेना लाबारि बाङ पिन्दोला । नेपालला तामाङतेन बामरि बाम यारि या लासि ङ्हाच्छा नितोला । आमाग्योइ थेन रिमठिमदा तेन्सि ब्राबारि मिरिकसे प्रताप बल ह्राङबा ग्योइकाइखेन्पो याङबाला मुला । आस्याङ तिमी आफै सोच बिबा छ्योइ ब्रिखेन प्रताप बलसे छ्यो आछ्यो दर्जन गिक छ्योइला फ्युक्पो प्रताप बलएन एन्से याङबाला मुला । बल आस्याङदाएन डेन मुला । डान्मुला । आमाग्योइदा छार्ना ल्हेना लातोबा गे एलाएन हिन्ना । खाम्देदोना क्योङसेन गे लानोन तोला । चु दातेला दुइसे म्हाइबा ग्याम हिन्ना । दाते जाम्बुलिङ खोरला खाज्युवाइ कुनिरि चिसाइ ह्याङ तामाङला रिमठिमला दोङबो ह्याङला नेपालरिन मुला । ज्योमोलोङमाला क्युइ ब्योङसि गान्दि दोबाला हिन्ना । क्यास्पियन सि दोबा हिन्ना । दोबाला हिन्ना ।
टिस्टा थासि निसाइ अरबला खाडी रि दोसाइ ह्याङ तामाङमि तामाङ नोन हिन्ना । रिमठिम ग्योइ थेन गोइलो ह्याङसे ख्लाबा आता । सन्तविर म्हेमेसे हुन्बा ग्यालाम ख्लाबा आता । ल्हुइ थेन सेम ग्लागिकरि आरे चु देन्बा ताम हिन्ना । ल्हुइमि बाध्यतासे गान्दि क्याम्साङ दोना लाबाला मुला । ब्ल थेन सेम ह्याङला ग्लागिकरिन चिबाला मुला । ताम्बासे सुङबाह्राङ ह्याङला कुदाप गिनोन हिन्ना । खालाइसे खालाइदा लेबाफेबा लाबाला आरे ।
गाङस्योङ थासि चु ल्हुइ अरबरि दोसाइ अमेरिकारी दोसाइ जाम्बुलिङ खोरला तामाङसे ह्राङ केबा ह्युल्साला आमाग्योइ आतो बिबा आरे । आतो बिा खालाई आरे ।
ओन्मा केबा राङगिक जेन
सीमा सीमा राङगिक जेन
न्होरला माया ख्लातोबा
दिमला माया ख्लातोबा
सिाइ तिकाइ आबोर्बा
जाकजिक जाहान क्रामुला । (लामा यी १९५७ः३२)
ताम्बा काइतेनरि चुह्राङबा लासि ओस्सोन बिबा आहिन । ह्याङसे सिसि बोर्बा बिबा तिगाइ आरे बिसाम तिक्दा तिरेला केबारि आज्याबा लासे ? आज्याबा म्हान्से ? तिक्दा च्योच्यो आलासे ? डान्सि म्हान्सि बातोबा चिम । मिरिक एदा चुनोन ङाला डेनमुला । फ्याफुल्ला नोन बितोला । खाबा दुइरि एन मिरिकरिन रुप आतासाइ खानाङदाम्मान केसाइ ह्याङ तामाङ । रिमठिमला दोङबो ह्याङ तामाङ । डाम्बा ह्राप्सि स्यातोला । तागिर थेन सुर्ताम क्वान्सि ङा खाला । आङगि थेन पाङतेन क्वान्सि ए खाऊ । चु खाबा ल्होछाररि म्रावाइ जोडि ह्राङ फिरफिर स्तोला ।
म्हेन्दो छार्सि समतोबा
तिप्लिङ राङबा चु जुनि
सिमि तिकाइ आबोर्बा
लासि थानो रामराज्य
आरे जुनिला भरोसा ।
(ताम्बाला ह्वाइ)
आसिना सोसाम तिलिह्राङ छोसाम रुप ताला खाबा ल्होछाररि । रुप ताला खाबा ङ्हाच्छा जोम्नारि सेमसे म्हान्बा छ्योगाइ ल्हेगाइ मिरिक एदा ङाला सेम न्हाङसेन डेन मुला । तिङमाइ मिरिक एदा ख्लासि नेपाल दोसाइ थे रत्नागिरी विजय होटल थेन आहालेला स्टल नं. १० दा ङाइ म्लेबारि आँखाम । तिदिङ चुह्राङबान ताजि । रुपताला खाबा जोम्नाला दुइसाङरि ।
आर के जिम्बा पूर्वेली