हाम्रो घरमा खुसीयाली छाए पनि हुन्थ्यो
नत्र भने जाबो दशैं नआए पनि हुन्थ्यो
ठूल्छोरालाई जाँगे छैन स्यान्छोरीलाई जामा
धोती फाट्यो किन्देऊ भन्छे छोर्छोरीकी आमा
आफूले नि सुर्बाल फेर्न पाए पनि हुन्थ्यो
नत्र भने जाबो दशैं नआए पनि हुन्थ्यो
मीठो चोखो मसिनाको भात चाख्नलाई
आँगनीमा कालो बोको बाँधी राख्नलाई
यो मन भन्छ त्यसो गर्न पाए पनि हुन्थ्यो
नत्र भने जाबो दशैं नआए पनि हुन्थ्यो ।
-रमेशचन्द्र घिमिरे
भोर्लेटार, लमजुङ