नेपाल यो स्वर्ग हो

नेपाल यो स्वर्ग हो : ( कविता )

नेपाली जगका सु संस्कृति अझै चम्किरहेछन् यहाँ
जन्मे बुद्ध यहीँ बढीकन अहो सत्मार्गको खोजमा
के बोल्छौ अब हे महान जन हो होच्याउँदै देश यो
पल्टाऊ इतिहास बुझ्न सहजै नेपाल यो स्वर्ग हो
!!१!!

आमाकै मनमा म देख्दछु सँधै अगाध छन् प्यार ती
जन्मन्छन् सय अप्सराहरु यहीँ छक्याउने ईन्द्र नी
खानीनै छ यहाँ सबै जगतका शान्ती र सौन्दर्यको
सेताम्मे हिमशैलको छ धरती नेपाल यो स्वर्ग हो
!!२!!

गुम्बा मन्दिर चर्च छन् सब यहाँ सुधर्मका देवल
विश्वैको मन खिच्न सक्दछ धनी नेपालले केवल
रोपौँ फूल विकासका लहरमा यो देश चम्काउँदै
फाल्गुनन्द र बुद्धका जनकका सत्कर्म फैलाउँदै
!!३!!

ती पासाङ बलभद्र अंशु अरनी राम र संख्वाधर
जुट्ने हुन् सब ती बनाउन भनी नेपाल यो सुन्दर
लुट्ने ती सब नै यहाँ गरिब हुन् अस्तित्व नेपालको
तिम्रै त्यो ममता अमूल्य छ मुमा नेपाल यो स्वर्ग हो
!!४!!

कोदो फापर धान जौ सब यहाँ खानै त लौ टन्न छ
यो राज्यै बलियो भयो यदि भने नेपाल सम्पन्न छ
सिक्नेछन् शुभ कर्म बालक सबै नभैदिए युद्ध त्यो
जागौँ गर्न विकास लौ सब जना नेपाल यो स्वर्ग हो
!!५!!

बग्छिन् ती सरिता पबित्र तटमा डुल्दै गरी सल्बल
नाच्दैछन् मन यो नपुगि कन त्यो तान्सेनमा छम्छम
स्वर्गैमा पनि लौ सुशान्त सबको यस्तो त कुन् लोक थ्यो ?
ईन्द्रैले पनि के वयान गरथे नेपाल यो स्वर्ग हो
!!६!!
– अर्जुन दुलाल
ठेगाना : दानाबारी ईलाम
ईमेल : [email protected]

  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *