अनमनाट

भोक लाग्या वाला भोका जसा नाइथिन?
खायाका वाला भोका जसा छन् ?
उनीला जसा निकाइ छन, सियाका वाला उङ्दा छन्
होइ रयो केइ नाइ पुइ लै क्याइ होइरैहो हड भरी झन्झनाट?
याँ के होइरैछ? कसो होइरैछ ? सुदोइ लै आँखा अनमनाट

थाकेका वाला अराम गरेका जसा
आराम गरेका वाला थाकेका जसा
मौ जौ भएका वाला मौ नभएका जसा
अपुताली वाला मौ भएका जसा
होइ रयो केइ नाइ पुइ लै क्याइ होइरैहो हड भरी झनझनाट?
यां के होइरैछ? कसो होइरैछ ? सुदोइ लै आँखा अनमनाट

नौकरी वाला केइ नभया असन्तुष्ट जसा
घरैमा बस्याका वाला चमचमना सन्तुष्ट जसा
ब्या गरेका कोही कोही गमगमना भया जसा
ब्या नगरेका हिट्याका डुल्याका मत्त्ता हात्ती जसा
होइ रयो केइ नाइ पुइ लै क्याइ होइरैहो हड भरी झनझनाट?
यां के होइरैछ? कसो होइरैछ ? सुदोइ लै आँखा अनमनाट

नेता जनता जसा, जनता नेता जसा
आयाका गयाका जसा, गयाका आयाका जसा
निको बोल्ल्या गट्टा जसा, गट्टो बोल्ल्या निका जसा
इजा बुवा दुश्मन जसा, भाइरका मान्स आफ्ना जसा
होइ रयो केइ नाइ पुइ लै क्याइ होइरैहो हड भरी झनझनाट?
यां के होइरैछ? कसो होइरैछ ? सुदोइ लै आँखा अनमनाट
?

चोर साधु जसा, साधु चोर जसा
हाँस्याका मान्स रोएको जसा, रोयाका भित्र हाँस्या जसा
दवाइ बिकामिला जसि, बिमार कोरोना जसा
होइ रयो केइ नाइ पुइ लै क्याइ होइरैहो हड भरी झनझनाट?
यां के होइरैछ? कसो होइरैछ ? सुदोइ लै आँखा अनमनाट

राहत नपाउनु पड्ड्यावाला लाइनमा छन्
राहत पाउनु पड्ड्या वाला आयाइ नाइ
लडाइ जहिले लड्डु थ्यो उन ध्यान योगमा छन्
लडाइ उन गद्दार्यान जो सुदोइ जाइ लाग्या
होइ रयो केइ नाइ पुइ लै क्याइ होइरैहो हड भरी झनझनाट?
यां के होइरैछ? कसो होइरैछ ? सुदोइ लै आँखा अनमनाट

खुबै होइ गै अनमनाट
के सही ? के गलत ?
कोरोना कि सलह कि दुनियाँ ?
खुबै अनमनाट !!!

-शिवराज कलौनी
२०७७/०३/२०