दिगन्त सारथि
प्रेमिल मुस्कान
कुनै नफक्रेका फूलहरूका बास्ना
खोल नहालिएका सिरकहरू
पुल नबनाइएका खोलाहरू
सिउँदो नरङ्ग्याइएका निधारहरू
उद्घाटन नगरिएको
कुनै कायाको सिँढी
भयावह
तर, कौतुक जँचेका
परीक्षाका प्रश्नहरू ।
विश्व
खरबारी हो
जहाँ अनेकानेक जीवजन्तु
उफ्रेका छन्
राग रतिराग
छरेर
सृष्टि
उम्रिएको छ
पम्पिएको छ
माया जसको न कुनै लिपि हुन्छ
जसको न कुनै परीक्षा हुन्छ ।
अन्तर्यमा
तिरोहित समागम
केवल आनन्दका लागि हो ।