प्राण जाँदा एक फेर राम खोज्दो रैछ मान्छे ।

जन्मेपछी पाइलो टेक्ने ठाम् खोज्दो रैछ मान्छे,
ठाम पाएपछी जून् घाम खोज्दो रैछ मान्छे ।

जून् घामले अघाउँदैन पेट् बढ्दै गएपछी,
जून घाम पछी फेरी माम खोज्दो रैछ मान्छे ।

अनि चाल्छ दुनियाँको संघर्षमा हात पाउ,
माम पाए पछी फेरी काम खोज्दो रैछ मान्छे ।

किन गर्थ्यो सित्तै काम ? गर्छ एक एक हिसाब्
काम पाए पछी फेरी दाम खोज्दो रैछ मान्छे ।

जति दाम पाए पनि भरिंदैन उस्को मन,
दाम पाए पछी फेरी नाम खोज्दो रैछ मान्छे ।

जवानीको कुकर्मले आँखा खोल्छ बुढ्यौलिमा,
प्राण जाँदा एक फेर राम खोज्दो रैछ मान्छे ।

अझै एउटा लोभ् जाग्छ प्राण गए पछी पनि
सकेसम्म बैकुण्ठको धाम खोज्दो रैछ मान्छे ।