संसारै भुल्न सकिने

संसारै भुल्न सकिने हाँसै मीठो निर्मोहीको
ज्युहजुर मिसिएको भाषै मीठो निर्मोहीको

चाहनाका नजरहरु फ्याँक्दाखेरी मेरा सामु
आफै परुँपरुँ लाग्ने पासै मीठो निर्मोहीको

खसखस गर्दा पनि रिसै उठ्ने अरुको त
झ्याप्पै मन परेसि त काँसै मीठो निर्मोहीको

सोच्दीहोली मनभित्र केके गर्न पाए हुन्थ्यो
त्यसैले त भाव हेर्दा खासै मीठो निर्मोहीको

जे जे लगाई जे जे खाई उसकै काम सबै राम्रा
अलकत्रै भए पनि गासै मीठो निर्मोहीको ।