ए नाम चलेकैसंग घरबार बसायौ तिमीले ।
उच्च कुलघरानमा नाता गसायौ तिमीले ।
मेरो प्रेमको सिहासन तिमीलाई सुम्पिदिए
मलाई भने सडकमा बास बसायौ तिमीले ।
माछा मिठा काँडा तिता निर्धोलाई नै मर्का पर्ने
निजी स्वार्थ पुरा गर्न मलाई फसायौ तिमीले ।
नङ मासु जस्तै व्यवहार गथ्यौ पहिले तर
आज आएर लौन मेरा शत्रु हसायौ तिमीले ।
भन मैले तिम्रो लागि कुन ठाउमा के गरेन
तर कालो मोसो मुखमा मेरो घसायौ तिमीले ।