अमेरिकामा अन्तराष्ट्रिय कविता महोत्सव सम्पन्न : रामबहादुर तामाङ प्रथम

असार १७, २०६८
भर्जिनिया, अमेरिका ।

आज भजिनियाको वेस्टफिल्ड स्थित होतेल मरियटको सभाकक्षमा नेपाली साहित्य प्रतिष्ठान, उत्तर अमेरिकाद्वारा आयोजित दोस्रो अन्तराष्ट्रिय कविता महोत्सव सम्पन्न भयो।

प्रतिष्ठानका अध्यक्ष एवम् कवि वसन्त श्रेष्ठको सभापतित्व तथा अमेरिकास्तिथ नेपाली दुतावासका प्रथम सचिव तथा कवि आनन्द शर्माको प्रमुख आतिथ्यमा भएको सो कविता महोत्सवको प्ररम्भमा आयोजक समितिका संयोजक गोबिन्दसिंह रावतले महोत्सवका बारेमा विस्तृत प्रकाश पार्नु भएपछि गत वर्ष भएको यस्तै प्रतियोगितामा विश्वभरबाट छनोट भई प्रथम हुनु भएका कवि नेपालका उमेश राई अकिञ्चनको नविनतम् कविता संग्रह ‘मोनालिसा र मार्च ८’ को पनि विमोचन गरिएको थियो।

त्यसपछि प्रारम्भ भएको कविता वाचनमा प्रतियोगी र अप्रतियोगी गरी दूई दर्जन भन्दा बढी कविहरूहरूले आ-आफ्नो कविता वाचन गर्नुभएको थियो। कविता वाचन गर्नेहरूमा नेपालबाट आउनु भएका वरिष्ठ कविहरू बिश्वविमोहन श्रेष्ठ, दिल्लीरमण शर्मा अर्याल, चन्द्रकला नेवाः, ललिता दोषी तथा उत्तर अमेरिका मै बस्तै आउनु भएका वरिष्ठ कविहरू हेमन्त श्रेष्ठ, गोविन्द गिरी प्रेरणा, गोबिन्दसिंह रावत, विनोद रोक्का, गीता खत्री, होमनाथ सुवेदी, गुणराज लुईटेल, प्रकाश नेपाल, प्रेम संग्रौला, आदि हुनुहुन्थ्यो।

कविता वाचन कार्यक्रमपछि यस वर्षको अन्तराष्ट्रिय कविता प्रतियोगिता २०११ को नतिजा प्रकाशित गर्दै संयोजन समितिका सदस्य प्रकाश नेपालले उत्कृष्ट कविता छनौटको प्रकृया बारे जानकारी दिनुभयो । विश्वभरिबाट २०० भन्दा बढी कविताहरू प्राप्त भएका थिए । त्यसरी प्राप्त भएका कविताहरूलाई पहिलो चरणमा अमेरिकामा गठित सात सदस्यीय मूल्याङ्कन समितिले छनोट गरी अन्तिम छनोटका लागि तीसवटा कविताहरू नेपालमा पठाएको थियो । ती तीस कविताहरूमध्येबाट नेपालमा गढित पाँच सदस्यीय निर्णायक समितिले दिएको अंकको आधारमा प्रथम, द्वितीय र तृतीय घोषणा गरिएको थियो।

माथि उल्लेखित छनौट अनुसार नुवाकोटका रामबहादुर तामाङको ‘सम्बोधन’ प्रथम, क्यानाडा, मिसिसांगाका भावना पोखरेलको ‘चराहरू’ दोस्रो र पोखराका शरण आँसुको ‘असमय’ तृतीय भएको थिए। यसरी पुरस्कृत हुने कविहरूमध्ये प्रथम हुने रामबहादुर तामांगले एक हजार अमेरिकी डलर सहितको हेमसरिता पाठक भानुभक्त काव्य पुरस्कार, दोस्रो हुने भावना पोखरेले तीन सय डलर सहितको शर्मा मुठभरी मोतीराम काव्य पुरस्कार र तृतीय हुने शरण आँसुले दुई सय डलर सहितको बसुन्धरा गणेश रोका देवकोटा काव्य पुरस्कार र प्रमाण पत्र पाउनुहुनेछ। साथै प्रथम पुरस्कार प्रप्त गर्ने कविको एउटा कविता संग्रह पनि प्रतिष्ठानका तर्फबाट प्रकाशित गरिदिने छ।

कार्यक्रम कवि तथा प्रथितष्ठानका महासचिव हेमन्त श्रेष्ठले संचालन गर्नु भएको थियो।

स्मरण रहोस, नेपाली साहित्यमा फुटकर रचनाको प्रतियोगिता तर्फ प्रदान गरिने यो नै सबैभन्दा ठूलो धनराशी भएको पुरस्कार हो।