लडायो कि भुइचालोले

पीर पर्‍यो घर मेरो लडायो कि भुइचालोले
आगो बली हेर्दा हेर्दै डडायो कि भुइचालोले

स्याहार् त्यसै नपुग् थियो प्रदेश आफू लागेपछि
भासिएको खम्बा झनै, गढायो कि भुइचालोले

बिर्ता बेची बिदेशिएको थाप्लो अझै डामै हुँदा
ऋणमाथि ऋणको भार बढायो कि भुइचालोले

बाँकी मेरो के नै हुन्छ यदि त्यो घर् लड्यो भने
भा को एकै पुर्खे नाता तोडायो कि भुइचालोले

घर लड्यो दाजु मर्यो बैनी अझै नभेटिँदा
लासमाथि लास्कै थुप्रो चढायो कि भुइचालोले

गाउँ पुरै रुवाबासी बसाइ सर्न वाध्य पारी
गरीबीको बास स्थान छोडायो कि भुइचालोले

बुद्धि मोक्तान