युद्धले भुलेका बाँकी युद्ध

फक्ताङ्लुङ्को फेदीमा
एउटा थेप्चे नाख
एक तमासले उफ्रन्दै छ,
हातमा मिराक लिएर —
उद्घोस् युद्धको गर्दै छ ।
ऊ भन्छ —
सेम्याङ्फुङ, सिरबन्दी,
ने:से र लाङ्बाङ्गी,
हाङ्जाङ र मेख्ली
रो’को रोई छ,
मलाई मेरो पहिचान – फिर्ता देऊ ।
यो युद्धले भुलेको
एउटा बाँकी युद्ध हो
म त्यही युद्ध लड्दै छु ।

म,
एकिकरणको भालाले रोपिएको छु,
एकात्मक सङ्गिनले घोचिएको छु,
भूमिसुधारको तरवारले काटिएको छु,
केन्द्रिक्रित गोलीले हानिएको छु,
मलाई घाइते बनाइएको छ,
म घाइते बाघ हुँ ।
मलाई जिस्काउने
कोशिस नगर्नु ।
म महान युद्धमा छु,
किनकि ?
यो युद्धले भुलेको
एउटा बाँकी युद्ध हो,
म त्यही युद्ध लड्दै छु ।

सप्तकोशी, अरुण, तमोर,
कबेली, ईवा र हेवा फेवाको कसम
म,
मेरी आमाको
अश्मिता बच्चाउनको लागि
हजार बर्ष
युद्ध लड्न तयार छु ।
बिना शर्त मलाई
मेरी आमाको अश्मिता – फिर्ता देऊ ।
यो युद्धले भुलेको
बाँकी युद्ध हो
म त्यही युध लड्दै छु ।

सबै र सबै बिक्री भए पनि,
सिरिजङ्गा, इमानसिङ, फाल्गुनन्दहरूको कसम
सु:म्हालुङ, मेयङ्लुङ, पाथिफरा,
कुम्मायक, कुसायक, माइ र बुडासुब्बाहरू
छेत्छेत्ती छन,
मलाई आशीर्बाद छ यिनीहरूको,
म,
यिनीहरूको अस्तित्व बिक्न दिन्न,
थेप्चो नाख
एक तमास् उफ्रन्दै छ ।
यो युद्धले भुलेको
एउटा बाँकी युद्ध हो
म त्यही युद्ध लड्दै छु ।
मेरी आमाको अश्मिता – फिर्ता देऊ ।
मलाई मेरो पहिचान – फिर्ता देऊ ।
मलाई मेरो पहिचान – फिर्ता देऊ ।
मलाई मेरो पहिचान – फिर्ता देऊ ।

जनवरी, ८, २०१२

केही भाषिक अर्थहरू
सेम्याङ्फुङ, ने:से, लाङ्बाङ्गी – लिम्बुनीहरूले लगाउने गहनाहरू
हङ्जाङ, मेख्ली – लिम्बुले लगाउने लुगा
सुम्हालुङ, मेयङ्लुङ, कुम्मायक, कुसायक – लिम्बु नामका धार्मिक स्थलहरू