किन मिल्काएका कलम यसरी ?
संविधान लेख्नु पर्दैन ?
कि मसी छैन र त्यसमा ?
मसँग दुवै छन् : कलम, मसी
तिमीलाई चाहिन्छ र ?
हिजो भनेको हुँ नि
संविधान लेख्न तिमीलाई
कलम दिन्छु, भावना दिन्छु
माटोको वासना दिन्छु भनी
खै मागेनौ त ?
कि कुर्सीको तानामा
बिर्सियौ आफ्नो जिम्मेवारी ?
कति अलमलले घेरिएका ?
कति कन्फ्युजनमा बेरिएका ?
संविधान लेखन
जागिर हो कि कर्तव्य ?
संविधानका अक्षर
किचलो हो कि मर्म ?
छलफल गर्नु छ तिमीसँग
पोखिनु छ निर्घातले ।
छलफल गर्न
किन १४ गते ताक्ने ?
किन १५ को साइत बार्ने ?
आजै बसूँ र छलफल गरौँ
राति १२/१२ बजे होइन
दिउँसै कुरा थालौँ
अनन्तसम्म पर्खिने धैर्यताबाहेक
सबैथोक छ मसँग
विचार, भावना, कलम, मसी, जाँगर …
भन, के चाहिन्छ तिमीलाई ?
म सबै दिन्छु तर चाहिन्छ उत्सर्गकल्पित
सग्ला भावनाका सुस्पष्ट संविधान
सबै अट्ने भूगोल
मलाई पनि कनिकाजति स्पेस
माटो टेक्ने अधिकार र एक मुट्ठी शान्ति ।
झमकसँग होइन
तिमीसँग डेटिङ् गर्छु म आज
समय छ त
मलाई डेटिङ् दिन ?
नेपाल साप्ताहिक ४६०