तिम्रा आँखा बाट संधै झरेको म मान्छे

गजल

—– दिंग्लाली कान्छो

तिम्रा आँखा बाट संधै झरेको म मान्छे
पल-पल जिन्दगीमा मरेको म मान्छे

आफ्नो मुटु रित्तो पारि दिएको थें मैले
विधाताले सिङ्गै भाग्य हरेको म मान्छे

रुखबाट पात झरे सरह नै फाल्यौ
तिम्रो मन बाट अन्तै सरेको म मान्छे

सम्झुं बिर्सुं भन्दै आज पर्खनु भो खालि
अनगिन्ति दोधारमा परेको म मान्छे

कुनै दिन आफ्नो ठान्ने सपना त्यो बोकी
मुटु फोरी दोबाटोमा छरेको म मान्छे