वास्तविकता अर्कै हुन्छ

वास्तविकता अर्कै हुन्छ भावनामा नहराऊ
बिना गल्ती कसैसँग कहिले पनि नडराऊ

ठिक ठाउँमा बस आफू झुटको खेती गर्नुहुन्न
शान्त भई कुरा गर रिसाएर नकराऊ

स्वार्थी छ यो संसार नै मान्छे पनि स्वार्थी हुन्छ
आफ्नो स्वार्थ पुरा गर्न अरु दुखी नगराऊ

रुवाएर अर्कोलाई आफू हाँस्दै हुन्छन कति
शत्रु नै होस् पीडा हुँदा कहिले पनि नरमाऊ

च्यातिएको मन देखे कोशिश गर सिलाउने
तिखा बचन बाण हानी अँझै धुजा नबनाऊ

सृजना न्यौपाने
दमक झापा
हाल यु एस ए