यतिबेला मेरो मथिङ्गल
सुडान अनि सोमालिया भएको छ ।
मेरा आफ्ना आँखाहरू
धोकाका ढोकाबाट नियालिरहेका छन्
सुकाइएका अनन्त सपनाहरू
अनि तन्द्राका बिस्कुनहरूमा
रजाइँ गरिरहेका छन् रातहरू
मेरो शिरको सगरमाथा
एक्लो उभिएको छ ।
गिध्दहरूको झुण्डहरूबाट
निस्किरहेको सिनोको लालसामा
मेरो देश कहीं कतै
दिग्भ्रमित र विस्मृत छ ।
यतिबेला मेरो आस्था
आफ्नै विचार र आचारका विरुध्द
आन्दोलनरत् छ ।