मझेरी भलाकुसारी, अंक ११ (सूर्य चेम्जोङ)

सूर्यजी, मझेरी भलाकुसारीमा स्वागत छ । शुरुमा, आफ्नो परिचय दिनुस् न ।
धन्यवाद तपाईँलाई । मेरो परिचय भन्दा म एउटा नेपाली साहित्य लेखनमा बामे सर्दै गरेको नव-सर्जक ।

कुन उमेरदेखि र कसरी लेख्न थाल्नुभयो ?
भनिन्छ मानिस एक उमेरमा कवि बन्दछ । जब म पनि प्रेममा फसेँ । साँच्चै भन्दा त्यही उमेरदेखि म पनि साहित्य लेखनमा आकर्षित भएँ र लेख्न शुरु गरेँ ।

तपाईंका मनपर्ने लेखक-लेखिकाहरूको नाम लिनु पर्दा कस्को नाम लिनुहुन्छ ?
मन पर्ने लेखक लेखिकाहरू त धेरै हुनुहुन्छ । अहिलेको चर्चित साहित्यकार झमक कुमारी घिमिरे र यूवा गीतकार क्षवण मुकारुङ मलाई मन पर्ने लेखकहरू हुन् ।

लेखन तपाईंको लागि के हो ?
लेखन एउटा तपस्या हो । जो कोहीले लेख्छु भनेर लेख्न सक्तै यस्को लागि त त्याग र तपस्या र साधनाको आवश्यक पर्दछ ।

तपाईं आफ्ना रचनाहरूमार्फत पाठकहरूलाई कस्तो सन्देश दिन चाहनुहुन्छ ?
साहित्य मनोरञ्जनात्मक साथमा सन्देश मुलक हुनु नितान्त जरुरी छ । बिशेषत म आफ्ना रचना मार्फत क्रान्ति र शान्तिको सन्देश दिन चाहन्छु ।

पाठकहरूसँगको दूरी घटाउन केही त्यस्तो प्रयास गर्नुभएको छ ?
पाठकसँग को दुरी घटाउनको लागि रचनाहरू पठनीय बन्न जरुरी छ संख्यात्मक भन्दा पनि गुणात्मक रचनामा जोड दिएको मैले अचेल ।

तपाईंका अधिकांश रचनाहरू गजल र मुक्तक हुने गर्छन् । यी बिधा नै किन ?
प्राय जसो म गजल गीत मुक्तक र रुवाई नै लेख्ने गर्दछु । तर यसको मतलब यो होईन कि म कथा, कविता लेख्दिन । अहिलेसम्म मैले कथा र कविताहरू प्रकाशित नगरेर तपाईलाई त्यस्तो लागेको हुन सक्छ ।

कस्तो समयमा लेख्ने गर्नुहुन्छ ? अनि कस्ता विषयमा लेख्न रुचाउनुहुन्छ ?
हामी परदेशीहरूलाई लेख्ने समयको एकदमै अभाव हुन्छ । फेरि म त एउटा सेक्युरिटी अफिसर । साँच्चै भन्दा मसँग समय नै हुदैन । तर पनि म ड्युटीमै भएको बेलामा लेख्दछु । कोठामा आएर लेख्ने गरेको छैन ।

बिदेसिनु पर्दा कस्तो लागिरहेछ ?
बडो दुख लाग्छ । रहरले होईन बाध्यताले । खाडीको गर्मीमा फुङ उडेको बालुवामा सपना खोजिरहेका छौँ बडो नमिठो लाग्छ ।

दुबईमा बस्नुहुँदो रहेछ । त्यतातिर साहित्यिक माहौल कस्तो छ ? के-कस्ता कार्यक्रमहरू गर्नुहुन्छ ?
दुबईमा ईन्टरनेट साहित्य निक्कै फस्टाएको छ आजभोलि । हुन त यहाँ साहित्यिक कार्यक्रमहरू पनि भई नै रहन्छन । साँच्चै भन्दा यहाँको प्रवासी साहित्यिक माहौल निक्कै जमेको छ ।

नेपाली साहित्यको हालको स्थितिलाई कसरी मूल्यांकन गर्नुहुन्छ? साहित्यक्षेत्र उचित दिशातर्फ गइरहेको जस्तो लाग्छ?
अहिले नेपाली साहित्यको बिकास भईनै रहेको अवस्था छ । हुन त हामी विश्व साहित्यको क्षेत्रमा पुग्न अँझ समय लाग्छ । अहिलेको स्थिति हेर्दा मेरो बिचारमा यो गति सही र प्रगतिको गतितर्फ लम्किरहेको छ ।

ईन्टर्नेटको उपस्थितिले तपाईंको लेखनमा कत्तिको प्रभाव पारेको छ ?
हामी परदेशमा रहने सर्जकहरूको लागि सबैभन्दा भर पर्दो माध्यम भनेकै ईन्टरनेट हो । किनकि पत्र पत्रिका हाम्रो पहुँच भन्दा बाहिरको कुरा हो ।

आफ्नै लेखनमा कत्तिको सन्तुष्ट हुनुहुन्छ ?
एउटा शिकारू हुँ म त भर्खर लेखनमा बामे सर्दे गरेको । त्यसैले मैले निक्कै लामो यात्रा गर्नु पर्ने बेला अहिले नै मैले आफ्नो लेखनमा सत्तुष्ट हुने अवस्था छैन ।

निकट भविष्यको लागि तय गरेको केही त्यस्तो योजना छन् ?
निकट भविष्यमै एउटा गजल संग्रह चौकीदार भाग-१ जो मेरो आत्मकथासँग सम्बन्धित छ यही निकाल्ने सोँचमा छु ।

मझेरी कत्तिको हेर्ने गर्नुहुन्छ ? तपाईंलाई कस्तो लाग्छ ? नियमित पढ्ने गरेको कोही त्यस्तो लेखकहरू छन् ?
म मझेरी को नियमित पाठक हुँ मझेरीमा रचना लेख्नहुने सबै लेखकहरूको रचना उत्तिकै राम्रा भएको पाएको छु ।

मझेरीको लागि अरू प्रभावकारी बनाउन केही सुझाब छन् कि ?
अकबरी सुनलाई कसी लगाउनु आवस्यक हैन, कुमार सर ।

मझेरीका संसारभरिका लेखक-पाठकहरूलाई के सन्देश दिन चाहनुहुन्छ?
आउनुहोस्, हामी सँगै हातेमालो गरेर नेपाली साहित्यकासलाई विश्व साहित्यको हाराहारीमा पुर्याऔँ । हामीले चाहे के हुँदैन र ? नेपाली साहित्यलाई सधैँ माया गरौँ ।

अन्तमा, केही बताउन चाहनुहुन्छ भने बताइदिनुहोला ।
अन्त्यमा मलाई दुई शब्द राख्न अवसर प्रदान गर्नु हुने कुमार सिंखडा सर, अनि मझेरी परिवारलाई धेरै धेरै धन्यवाद ।

सूर्य चेम्जोङका रचनाहरू