सागर गहिराइको मुगा हौ कि नारी तिमी
सुनौलो पिंजडाको सुगा हौ कि नारी तिमी
अत्याचारी असिनाले चुटे पनि मुस्कुराउने
काँडामा फुल्ने फूलको थुङ्गा हौ कि नारी तिमी
ममता र भावनाको भवसागरमा बाटो हराएर
किनारा खोजिरहेको डुङ्गा हौ कि नारी तिमी
लान्छना र आरोपको धुलो मैलो टाँसिएर
धुँदा धुँदै च्यातिएको लुगा हौ कि नारी तिमी
प्रकृतिको अनुपम उपहार कोमलताकी खानी
मूर्ति जस्तै कुँदिएको ढुङ्गा हौ कि नारी तिमी