बाहिर साउने झरी मन भित्र चैते खडेरी
नसोचेको बाहानाले पाइला लार्खाराउँछन् घरी घरी
कहिले हारे जस्तो कहिले जिते जस्तो
नभएको प्यारो भएको सस्तो
कुनै पल जितमा पनि हार
अनि
कुनै पल हारमा पनि जित
खहरे हो कि नदी हो
अमृत हो कि जहर हो
बुझ्नै नसकिने यो जिन्दगी खोइ कस्तो कस्तो
विरहको बतासले निदहरू उँडाइ दिन्छ
अतितको झल्कोले घाउहरू बल्झाई दिन्छ
कहिले लुटिए जस्तो कहिले टुक्रिए जस्तो
परेलीको पानी बनिदिन्छ सस्तो
कुनै पल सपना पनि बिपना झैँ लाग्ने
अनि
कुनै पल बिपना पनि सपना झैं लाग्ने
हाँसो र रोदनको संगम हो कि
मिलन र बिछोडको ऐना हो
चिन्नै नसकिने यो जिन्दगी खोइ कस्तो कस्तो
रातहरूले दुखाउँछन्, दिनहरूले तर्साउँछन्
निस्पात बाँधिएको मनलाई चाहानाहरूले चर्काउँछन्
कहिले उदाए जस्तो कहिले अस्ताए जस्तो
टाढाको तिर्सना नजिक को सस्तो
कुनै पल आफैं भित्र बिरानो पन
अनि
कुनै पल बिरानोमा आफ्नो पन
भरोषा र विश्वासको बन्धन हो कि
धोका र भ्रमको पर्दा हो
भन्नै नसकिने यो जिन्दगी खोइ कस्तो कस्तो
यो जिन्दगी खोइ कस्तो कस्तो ?
लक्ष्मी अनुरागी