बेंसी झर्छु बिहानै म ओरालीमा खोज्नु
साँझ घर फिर्छु फेरि उकालीमा खोज्नु
मंसिरैमा धान झार्ने खलामा म हुन्छु
असारैमा खेतबारी र आलीमा खोज्नु
गाई बस्तु, घाँस काट्दै डाँडा पाखा डुल्छु
भञ्ज्याङैको बर-पिपल सियालिमा खोज्नु
भोक रोग गरिबी र अशिक्षा छ यहाँ
म अनि छ देश त्यहाँ कर्णालीमा खोज्नु
दुनियाँको सामु हाम्रो उठाउनु छ शिर
सम्भावना के छन् अरु नेपालीमा खोज्नु
गुप्तेश्वर-३,रामेछाप
हाल:अबुधाबी,युएई