तर……..
पासाया ल्हाः थर्रर खात भुसुभुसु चःति वल । तुति याग्लाप्याग्ला वन । म्ह छम्हं मू हाल । वं म्हगसय् तकं मखंगु खँ वल । व किंकर्तब्यबिमूढ जुल । गन खः अन हे थिंग दंगु दनांतुं जुल ।
“पासा झीगु अनन्त यात्राया थ्व न्हापांगु पलाः खः , न्हापांगु यात्राया शुरुवात हे …” जिगु खँ पुवने मलावं हे – तर, थ्व जि पाखें जुइमखु – वं थःगु क्वःछिना कन –जुइ मखु जुइ मखु जुइहे मखु । थुलि धयाः व थुकथं च्वन – यत्थे सिइ दु व थःगु निर्णयं देग लिचिली मखुत ।
तर ,
तर जितः थ्व ज्या व पाखें हे याकेमाःगु दु । मेगु छुं हे बिकल्प जिं खनाच्वनागु मदु । थन कि व दु कि जि दु । मेपिं सुं हे मदु । दुपिं फुक्क यक्व तापाये धुंकल । इलं मलाये धुंकल । म्होचा इलय् यायेगु ज्या धयागु जिं खनाकथं थ्व हे जक खः । अले मेपिं सुं हे मदुगु कारणं याकेमाःगु थ्व ज्या व पाखें हे खः । व जिमि पासा । पासायात थन पासा हे जक धाये । छाय्कि वयागु नां थन मकने । जिं नं थःगु म्हसिका सुचुका हे तये । बस् वयानं जि पासा हे जक । जिगु नं व पासा हे जक । पासां पासा । पासा ।
जि पूर्वयाम्ह । मांअबुं शहरय् आखः ब्वंकेत छ्वयाहःम्ह । तसकं दुःख सियाः अबुं शहरय् ध्यवा छ्वयाहइ । डेरा बाः पुले –आखः ब्वने । छम्ह तःधंम्ह मनू जुइमाःगु दु जिं । जिमि मांअबुया म्हगस खः थ्व । जिं थः तःधं मनू जुयाः मांअबुया म्हगस पुवंका बिइमाःगु दु । मोहनिबलय् छेँ वनाबलय् मांया आसिका नं थ्वहे खः । अबुया आसिका नं थ्वहे खः ।
छम्ह तःधंम्ह मनू ……
म्हधिकः ला जिगु ५ फिट ५ इन्चि दु । तर थुकिं ज्या यानाच्वंगु मदु । छम्ह तःधंम्ह मनू जुइत अर्थात गुम्हेसिया छुं थःगु पहुँच थदु । गुम्हेस्यां भचा भचा हम्की दप्की नं याये थफु । खल्तिं व्दःबव्दः दां चानचुन थें खर्च यानाक्यने थफु । मालीबलय् प्यम्ह न्याम्हेसित न्ह्यः न्ह्यः लिउ लिउ तयाः नं जुइ थफु । अर्थात छम्ह तःधंम्ह मनूया माने थौं निरीह जुयाः म्वानाच्वंपिं जिमि मांअबुुं – जःलाखःलाया न्ह्योने छ्यं धस्वाकाजुइगु खः । थम्हं नं जःलाखःलापाखें सम्मानजनक ब्यवहार फयाकायेगु खः ।
छम्ह तःधंम्ह मनू जुइत जिं नं पुलिं चुयाः आखः ब्वना । डिप्लोमा नं पास याना । ज्या माः जुया । लँय् लुक्व ज्या याःजुयाः । जागिरहे धकाः पियामच्वना । छाय्धाःसां अबुं ध्यवा व्छयामहये धुंकल । ज्याथःपिं मांअबुपिंसं अःखःबतं काय् पाखें ध्यवाया आब याये धुंकल । ल्याय् म्ह काय् पाखें थःपिंत नं सुसाःकुसाः फ्वना हये धुंकल ।
शहर खः थ्व । शहर । महानगर । छम्ह तंःधंम्ह मनू जुइत,यक्व आखः ब्वने फयेके माः । ब्वनागु बिषय् बिशिष्तता हासिल यायेमाः । थुलि यायेत अर्थात छगू छगू बांलाःगु सब्जेक्टया आखः ब्वनेत पाँच लाख,दश लाख,बिस लाख खर्च याये फयेके माः । थुलि खर्च यायेमफुपिसं बांलाःगु सब्जेक्टय् आखः हे ब्वने खनीमखु । ब्वने न्ह्यालाः नं , ब्वने फयाः नं खर्च याये मफुसा वयागु निंतिं ब्वनेकुथिया लुखा हे चाली मखु । व मनू तःधंम्ह मनू जुइ खनीमखु ।
जाबो डिप्लोमाचा – वला थनया खातेतसें नं यानाच्वंगु दु ।
तर , थ्व खँ जिमि मांअबुं मसिउ । उमिगु निंतिं जिगु बि.ए. हे भराय्धंगु जुइ धुंकल । जि तःधंम्ह मनू जुइ धुंकल । उमिगु निंतिं अमिसं म्हंगु म्हगस पुवने धुंकल । जि काय् बि.ए.पास दु ,अमिसं गामय् फुँइ याये धुंकल । गामय् च्वंपिं सोझा गामाःतसें बी.एं पास काय्या मां–अबुपिंत भचा आदर भाव तयेगु याये धुंकल । बस् । आः कायं बाः वनाच्वंगु ध्यवाया खुसिबाःयात शहरं गां पाखे फस्वके जक ल्यंदनि । व हे गांपाखे फस्वयेत्यंगु ध्यवाया खुसियात पियाच्वंगु दु जिमि मांअबुं । तःधंगु आश कयाः । तर,काय् धाःसा शहरया फलय् फलय् पसः तयाः , कःनि मुस्या मियाः ,सुथ न्हापां दनाः छँे छेँय् पत्रिका इयुं वनाः नं थः छम्हेसित थिंग धस्वाके फयाच्वंगु मदु । घडीया पेण्डुलम थें यान्तां प्यान्तां यगानाच्वंगु दु ।
सच्छि सच्छि सच्छि । लं छपाया सच्छि – तिन्हिनय् फलय् व्दंचिंक लं मुंकाः हालाच्वनाबलय् लं छपा न्याः वःगु खः थ्व पासा ।
गथे जुयाः जिमि दथुइ नतुसुतु ब्यात । नुगः खँ स्वात । थ्व खँ ला आः जितः लुमं मजुल । तर अजूचायापुक्क नुगः स्वात । जिमि दथुइ धुवांधू नापलायेगु जुल । जिगु डेराय् व वल । वयागु डेराय् जि वनेगु जुल । वयेवनेया दथुइ यक्व खँ जुल । खँया खँय् – थःथःगु दुःखया खँ वल । दुखं भुंगु थःगु परिबेशया खँ जुल । मांअबुया म्हगसया खँ वल । सुखया खँ जुल । थौंया खँ जुल । कन्हय् या खँ वल । शहरया खँ जुल । परदेशया खँ वल । देशया खँ जुल । जुयाच्वंगु खँ वल । जुइमाःगु खँ वल । यानाच्वंगु खँ वल । यायेमाःगु खँ जुल ।
न्हि । वा । ला । दँ फुना वन । यक्व हे ततःपंगु सफू फपुल । मसिउगु सःसिउपिंके न्यनेकने जुल । देशया कुं कुलामय् तक मिखा ब्व ब्वं खँ ताःहाकयेक ताःहाकयेक जुल । अले चिहाकलं क्वःजित – पहाड दयाःहे तःजाः चीजाः जुयाच्वंगु खः ।
बस् । छु मानि व हे क्वःछिना कथं पहाडयात माथं वंकेगु अभियानय् जिपिं न्ह्याःवना ।सदिं निसें बःबः चट्टानं धी चिनाच्वंगु पहाड माथं वंकेगु धयागु ख्याः खँ मखु । ख्याः मखुगु थ्व खँयात नी कथं कया । लगातार पिकं पहाडयात क्वायेगु ज्या न्ह्याका जिमिसं ।
वं पिकं क्वाइ , जिं सावेलं धू वांछ्वये । जिं पिकं क्वाये , वं सावेलं धू वांछ्वइ । व गनयाम्ह खः । जि गनयाम्ह खः । अय्नं जिपिं निम्हेसियां नुगः स्वात । सकसिगु दुःख जिमित थःगु हे दुःख थें ताल । उकिं पहाडयात माथं वंकाः थथ्याः क्वथ्याः मदयेका व्छयेत जिमिगु ल्हाः तुति छस्वा जुल ।
थ्व सुरुवात हे जक खः ।
जिपिं निम्हेसिगु ल्हाःतं जक क्वानाच्वनेगु खःसा सदिं सदिं बिनावंसां पहाड धस्वाना हे च्वनी । थ्व जिमिसं सिउ । थुकीया निंतिं अल्याख ल्हाःया ग्वहालि मदयेक मगाः । व अल्याख ल्हाः सालाहयेत न्हापां जिमिसं नि थःगु ल्हाः न्ह्याकागु खः ।
तर , थ्व सुरवातया हे अजूचायापुक्क अन्त जुइत्यन ।
पहाड क्वाना च्वनाबलय् अचानक अनं वः थनं वः मदयेक मिग्वारा पिहां वल । मिखा फुति यायेमलाकं व मि ग्वारां जितः हे कल । जि भाराक्क क्वदल । जिगु जवगु ब्वह पाता हे ब्वयेका यंकल ।
गालय् कुहां वनेलाःगुलिं जिमि पासायात छुं मजुल ।
जिगु अन्त वल । जिं थनं हे दिपाः कायेमाःगु जुल । जिं दिपाः कायेमाःसां , जिगु अन्त जूसां थ्व अभियानया अन्त याके बिइ मजिउ जिं । थुलि जिं दुनुगलं निसें क्वःछी धुंगु दु । पहाडयात सुसाःकुसाः यानाच्वंपिंसं जिमित मामां च्वंनिसें घेरा ततं वयाच्वन ।
जि ला थनं छपालाः हे छी मफु । पासां जितः कुबियाः बिसिउँ वनेगु स्थिति नं मदु । वःपिसं जितः ज्वनीगु ला पक्का खः ।ज्वनाः हेलिकप्टरय् तइ । बांलाःगु अस्पतालय् यंकी । अनुभवि व बांबांलाःपिं डाक्टरतय्सं वासःयानाः जितः म्वाकी । जि म्वायेवं – कालकोठरी यंकाः कसा याइ । कसा यायां जितः जि पासाया बारे कनेत बाध्य याइ । थ्व अभियानया बारे फुक्क खँ सिइका कायेत जिगु म्हुतु वां खाकी । जिमिगु निष्ठापूर्ण ज्या खनाः खःगु हे ज्या खः धकाः ग्वहालिया निंतिं चुलिजाया वयाच्वंगु निपा प्यपा मेगु ल्हात नापं जिगु कारणं माथं वनी । जिगु हे ल्हाःतं जिं न्ह्याकागु अभियानया ककु म्वय्थ्यानाबिइ । अले अले जितः नं गुगुं तःजाःगु तुंथिइ यंका ………।
ओहो !
जि मू हाल । दक्व स्याःचाः ल्वःमन । मिखाय् थम्हं धस्वाका यंकाच्वनागु धरहरा घ्वारारारा क्वःदः वल ।
पासां मफु मफु जितः नं कुबिया यंकेगु असफल कुतः यानाच्वन । म्हपाता हे मदये धुंकूम्ह जि ताउत च्वनीमखुत । उकिं थः जक याकनं बिसिउँ वनेत पासायात धयाच्वना । कन्हे वं अल्याख स्पाती ल्हाः ज्वनावयाः थ्व पहाडयात माथं वंकेमानिगु जिम्मेवारी बोध याकाच्वना । लिसें ………………….
तर थ्व जि पाखें जुइमखु – वं अज्ज नं अड्डि कयाच्वन ।
जिमित ज्वनेगु , मफुसा सिधयेकेगु तातुनाः वयाच्वंपिनिगु ध्यागः पलासः तायेदयावल ।
बिचाः यायेमते ,ई मदु । जिगु परिचयं छ ववंथाय् किपालु थें लिउलिउ वयाः छंगु म्हसिका यचुक्क कनाच्वनी । छ सु खः ? छ गनयाम्ह खः ? छंगु मेपिं पासापिं सु सु खः ? छं यायेत्यंगु छु खः ? छ गन च्वनी ? छं छेँ जःपिं गन दु ? आदि इत्यादी छ्यातां च्वंका बिइ । सुलेत तकं छंत थाय् मदइ । छंत ज्वनेयानिंतिं छं छेँ जःपिन्त नापं कालकोठरी यंकी । छं बांलाक्क सिउ , थ्व अभियानय् न्ह्यानापिं झी सकलें परीचय बिहीन जुयाबीमाः । तर, छ न्ह्याथाय् वंसां परीचित जुयाबिइ , गुकिं झीगु अभियानयात तःधंगु नोक्सान जुइ । सफलतायात तापाका बिइ । छ लिसेया जिगु साथ ला थन हे तक्क जक जुल । थनं उखेया यात्रा ला छंगु हे ब्वहलय् दु । जितः सासः ल्हाये थाकुया वये धुंकल । जिगु माया कयाच्वनेमते । लक्षयात ज्वँ । हुँ । झीसं नापं च्वना खंकागु म्हगसयात पुवंकेत न्ह्याः हुँ । न्ह्याः हुँ । याकनं न्ह्याः हुँ ..
अन दु , अन दु , का ज्वँ ज्वँ , कयेकि जुक्कि — प्यखेरं पहाडं क्वस्वःगु टर्चलाइटया जलं जिमित खंकां त्वःतल ।
प्वालाक्क पल्पसा त्वल ।
त्वल पल्पसा । जिं मनं तुनाथें — जिगु छ्यों जक ज्वनाः पासा खिउँ थासय् झुग्रुब्वात ।

  •  
  •  
  •  
  •  
  •  
  •  
  •  

2 thoughts on “तःधंम्ह मनू ……”

  1. नेपालीमा अनुवाद पनि साथैमा
    नेपालीमा अनुवाद पनि साथैमा दिएकाे भए पाे सबैले बुझ्थे ।

    1. कथाको अनुवाद छिट्टै गर्ने छु
      कथाको अनुवाद छिट्टै गर्ने छु । सुझाब को लागि धन्यवाद ।

      नारद बज्राचार्य

Leave a Reply

Your email address will not be published. Required fields are marked *