उमेर

उमेर नै यस्तो रैछ मात बढ्ने मात ढल्ने
क्षणिक रैछ रङ्गीचङ्गी सारा तन त्यसै गल्ने

लजाउँदै तिनी आइन् मुसुमुसु मुस्काउँदै
मणिदन्त दर्शाउँदै जूनजस्तै आफै बल्ने

दुवै ओठ परिपूर्ण रक्तचन्दन लालित्य
शरीर कउल जस्तै दनदन आफै जल्ने

मृगका छन् नयन ती हिसीपूर्ण अनुहार
मृग नयनी भई भई काजलु आफै दल्ने

सबै तिम्रो सुन्दरता भगवानको भूलजस्तै
यो भूलमा रमाउँदा मासु नभै हाड गल्ने