१
आफू जली प्रकाश दिने शिक्षकको कर्म हजुर
पीडा व्यथा कति होलान् कतिकति मर्म हजुर
उर्जाशील समयमा अहोरात्र खटिइरहने
समाजमा शिक्षकले निभाइरहेछन् धर्म हजुर।
२
समयमा स्कुल पुगी कक्षाकोठा छिर्नुपर्ने
पसलमा उधारो छ होला कति तिर्नुपर्ने
सकेसम्म शिक्षार्थीलाई सिकाउन मरिमेट्ने
कहिलेकाहीँ अपजसको झोली पनि भिर्नुपर्ने
३
आफ्नो शिष्य सफल हुँदा शिक्षक कति खुशी हुन्छ
मान्छे नै त हो ऊ पनि कहिले हाँस्छ कहिले रुन्छ
सधैं भलो असल सोच्छन् विद्यार्थीको शिक्षकले
गुरु आज्ञा पालन गरे सफलताले शिखर छुन्छ।
४
जो जो जेजे बनेका छन् शिक्षकलाई जान्छ जस
असल शिक्षक खराबसामु हुदैंनन् टसको मस
केही शिक्षक खराब होलान् तर धेरै हुदैंनन्
जति पढ्यो उति पढ्ने बढिरहन्छ मनमा रस।
५
गुरु ब्रह्मा गुरु विष्णु गुरुदेव महेश्वर
कतिले त मान्ने गर्छन् गुरुलाई परमेश्वर
गुरु खुशी हुँदा जगत लाग्ने गर्छ सार्थक यो
शरण पर्छु उद्धार गर हे मेरा देवेश्वर।
कुमार काफ्ले
ओखलढुंगा।
भाव राम्रो छ कुमारजी ।
भाव राम्रो छ कुमारजी । दोहोर्याएर पढ्दा पनि केही लाइन चाहिं मीटर मिलाई सहजसँग वाचना गर्न सकिन ।