उसले यसरी प्रेम प्रस्ताव राखेर गई

उसले यसरी प्रेम प्रस्ताव राखेर गई
केही दिन बिचार गर्छु भन्दै चाखेर गई

तिमीले सम्झियौ भने मुटु पठाइदिनेछु भन्थी
आजसम्म बिर्सेकै छैन थाहा भो गफ हाँकेर गई

यो “रामु” आजसम्म कसैको भरमै पर्थेन
कस्तो भ्रममा पारिछ जाने बेला हाँसेर गई

म कैयौं रात सोचेर बसें – हाम्रो बीचमा के थियो ?
निष्कर्ष केही निकाल्नै सकिन कस्तो नाता गाँसेर गई ?

अचेल यही हल्लाले बजार निकै तातेको छ’रे
अचम्म आफ्नै हराएको सूचना आफै टाँसेर गई ।

रामकृष्ण अनायास