ललीपप देखाउने
कहिले फकाउने कहिले फुल्याउने
महोदयज्यू
अब कहिले हो त मुन्टो हल्लाउने
कहिले छुमन्तरले
पर तल हूलमै मिसाउने
कहिले रातो दलेर
नजिक माथि समानान्तर बसाउने
कोरोना नै बिर्सेर
लामै कानेखुसी गरेर भुल्याउने
महोदयज्यू
अब कहिले हो त मुन्टो हल्लाउने
असम्भव बाटोबाट
कोहीलाई कल्पनाको टुप्पामा पुर्याउने
तुरून्तै जमिनमा पछारेर
अर्कोलाई आफ्नै पक्षमा सूर्याउने
दिन्छुझैँ गरी चखाउने
कहिले जुधाउने कहिले उल्याउने
महोदयज्यू
अब कहिले हो त मुन्टो हल्लाउने
नमान्ने आफै चाउरिने
झुके, पछि लागिराख्ने गराउने
अगुवा नै चिप्लेपछि
कराउने सबै चुपचाप हराउने
आधी बितिसक्यो
अब आधी त यसैगरी झुल्याउने
महोदयज्यू
अब कहिले हो त मुन्टो हल्लाउने
बिरालाको घाँटीमा
अब कल्ले हो त घंटी लगाउने
महोदयज्यू
अब कहिले हो त मुन्टो हल्लाउने ।
– राकेश कार्की
लस एञ्जेलस