‘ह्याङ गोलेजुगु गोसाइकुन्डरि निला आदेमुला । थेरि निइ बिसि निजि बिसाम ग्यामरिन सिला रो । रुइबा, छिर्बा, छावा खाबा तामुला रो ।’ आपासे सुङजि, ‘ओन्मा ह्याङला म्हेमेतेन ङ्ह्याम्बु ग्लेला लडाइ तामा ङ्ह्याम्बुसे डाजिम । गोलेजुगु गोसाइकुन्डरि दोजि बिसाम कुन्डला क्युइ प्योसि खासि ङ्ह्याम्बुसे ग्लोङला रो ।’
‘दाङबोला ताम । थे कुन्डाला ग्याम तासि ह्याङला म्हेमे केन स्याङबोजा ब्रातोमुबा रो । केन स्याङबोजा म्हेमे ब्राबा दुइरि सातान ङ्ह्याम्बुसे ङोमुबा रो । खाइमागि हा सुङफेर्सि लोङना लाबा । खाइमागि स्वा लासि सा डुइसि डोना लाबा । खाइमागि दह स्वायाया प्योना लासि क्युइसे रिलख्वाइसि बोर्लाह्राङ लाबा ।’ आपासे सुङजि, ‘म्हेमे ग्रेन बोम्बो मुबा । थेताबासे नोन ङोमुसिम म्हाले म्हेमेदा । अतीन लामाहेन्सेम म्हेमेदा नोन झोक रेजिम ।’
‘ह्राङला ग्याम लुरुलुरु ब्रामा सुताइ तिल्दा ङादा ङोबा ? एसे म्हाइबान हिन्नोम ?’ म्हेमेसे बोमोसे कु ठोक्चिम, ‘दारे चु कुन्डारि कि एतेन एला सन्तान आता कि ङातेन ङाला सन्तान आता ।’
‘चु सर्त मन्जुर ।’ ओइमाहेन्से निउ म्हाइचिबा ङ्ह्याम्बु ग्लेसे बिजिम, ‘स्यान्दो बोम्बो पाजिदाम मेफ्रा दुल्बाह्राङ दुल्जिन्जि । एदानोन ओस्बान आलाना आख्ला ।’ गोले बोम्बो चानचुने शक्तिला आहिन बिबा ताम ङ्ह्याम्बु ग्लेदा नोन थाहा मुबा । म्हेमेला शक्ति च्याबारि ङ्ह्याम्बु ग्लेसे ओइमाहेन्सेन म्हेमेदा ग्यामरि ब्रामा बिथारि निउ म्हाइचिमुबा । माम छ्यामरि मुबासे म्हेमेसे था आतामाह्राङ लास्ह्युमुबा । तिनीजा बिसाम मामदा माइतीरिन ख्लासि म्हेमे गिक्खे ज्योन्गास्ह्युमुबा ।
छेबारि वाङजि । ङ्हिसेन खालाखाम्बा शक्ति उन्जि । छेना छेना ङ्हिनोन ब्लाप्जि । च्योच्यो ताजि । ङ्ह्याम्बु ग्लेसे बिजि, ‘तिनिदा चोतेन लिच्छारि छेला ।’ दिमरि दोतोबा म्हेमे फ्लिक दोसि केन स्याङबोजा नोन ब्राजी । तिलाई दिन लिच्छा म्हेमे मामदा बासि दिमरि ज्योन्खाजि । गोसाइकुन्डरि दोगामा ङ्ह्याम्बु ग्लेसे म्हेमेदा ग्याम पाङजि ।
‘ओइमाला बाचा म्लेआम्याङ’ ङ्ह्याम्बु ग्लेसे बिजि ।
‘तिनि मामखुइ मुला । लिच्छारि छेला ।’ म्हेमेसे सुङजि, ‘मामखुइ लोङला ।’
‘ए ओइमा ङाला माम खुइला ङ्हाच्छाजा छेबारि ताबा । एला मामखुइला ङ्हाच्छारि जा छेबारि आताबा ।’ ङ्ह्याम्बुसे घमन्ड उन्जि । ङ्ह्याम्बुला ताम थेसि म्हेमेदा उसुसु साजि ।
‘लु खाऊ छाम ।’ म्हेमेसे कुठोक्चि । ङ्ह्याम्बु दह फिरि थोन्जि । म्हेमेसे मामदा ङ्हा चुङपुङजि ।
‘ङा ब्रेजि बिसाम दहला क्युइका दोबाला दोबान ताला । डाजि बिसामका दोसि लिच्छा ङ्हे दोला ।’ म्हेमेसे मामदा सुङथान्जि, ‘दहला क्युइका दोचिजि बिसाम एसे ङादा ख्रुङआतो दिमरि निउ । जा जामेदा आपा सिजि बिसि पाङपिन्गो । ङ्हे दोजि बिसाम ख्रुङसि चिउ ।’ मामदा चोदे सुङसि म्हेमे दहरि प्लोन छ्योङजि ।
म्हेमेतेन ङ्ह्याम्बु छेबारि चुजि । छेना छेना दोलोला पिङपिङबा दहला क्युइ वापवाप तासि काफ्युर ताजि । मामसे म्हान्जि, ‘लाउ ङाला खेप्पा ङ्ह्याम्बुसे ग्लोङजिम ।’ माम क्राबा चुजि । माम क्राबा थेसि म्हेमे सेजिन्बा ङ्ह्याम्बु ग्लेदा ओतेबान ख्लासि माङग्यार थोन्स्ह्युजि ।
‘तिल्दा क्राबा माम खुइ ?’ म्हेमेसे ङ्योइजि ।
‘ङाइमि ह्राङदागा साइजिम बिसि क्राबोम ।’ मामसे सुङजि ।
‘ङादाम खाइ तिलाई ताबा आरे ।’ म्हेमेसे ह्राङला जिउ उन्सि सुङजि, ‘थेका मि ङ्ह्याम्बुला सेना मेना थेन ङ्ह्याम्बु ग्लेलागा ओम ।’
दह फिरि स्ह्युसि मामतेन बात लाचिबा म्हेमेदा सिलाजिन्बा ङ्ह्याम्बु ग्ले प्योलथोन्सि ङ्हेप्बा चुजि । थे दुइतेमा म्हेमेला नोन शक्ति घटप ताजिन्मुबा । म्हेमे ब्लाप्जिन्मुबा । दोसि छेतोबा ताजि ।
‘लु लु एसे ङ्हा ह्राप्बाला ह्राप्बान लाउ । चुदा तिनी तह लातोबान ताजि । ठ्याप्पान आख्लानि ।’ गे कुल्बान लामा दोलोका म्राङसि माम लोङबा म्हेमेसे डान्जि, ‘ङा माङग्यार खासि ताजि आबिते दोना ए मि च्युम्सि चिउ । मि ठ्याप्पान आठ्वाङगो । एदा लोङना ङ्हाम्साइ ङ्हा ह्राप्बारि आख्लागो ल्हा मामखुइ ।’
‘ताला ताला ।’ मामसे सुङजि । डेङडेङ… डेङडेङ.. मि च्युम्सि माम ङा ह्राप्बा चुजि । म्हेमे छेबारि चुजि ।
म्हेमेसे कुन्ड न्हाङला ङ्ह्याम्बुला दरबार छ्याकचिक लाजि । थेला ‘मनि’ ब्यान्जि । म्हेमेसे थोइजि । सा निलाबा ङ्ह्याम्बुदा ङ्हेप्सि म्हेमे माङग्यार थोन्जि । चुदे गाइबा दुइदोना म्हेमे थोन्बाह्राङ आछोर्बासे मामला सेम चाउ चाउ ताजि । खेप्पासे मि आठ्वाङगो बिथान्साइ ठ्वाङगे ठ्वाङगे म्हान्जि । ओस्सो मि ठ्वाङसि च्यामाम मामला ब्ला म्हाजि ।
‘आबिले आमा…।’ मामसे ङ्हा छ्याल्हिसि ह्यार्जि । मेह्राङ झलल लुङबा मनि थोइसि म्हेमेसे सिबारि सुङ आ आ लाचिबा ङ्ह्याम्बुदा बामरि थान्सि माङग्यार थोन्मा मामसेजा म्हेमेदा ङ्ह्याम्बुसे ग्लोङसि ह्राङदा चाबारि ह्वागाबाह्राङ छोर्जिम ।
दोलोन ब्लाप्जिन्बा म्हेमे ङ्हा ह्राप्बा शक्तिसे ङ्ह्याम्बुतेन छेसि डामुबा । मामसे ङ्हा छ्याल्हिबा लिच्छा म्हेमे लालक लुलुक ताजि । दहरिमार फ्युल निजि ।
‘ओन्माला ताम देन्बामि तिला मुग्याम ? दातेम चु तामरि खालाइला विश्वास आरे ।’ आपासे सुङजि, ‘थे माम थिङस्या मुबा रो । ह्याङ गोलेजुगुसे थिङस्यातेन ब्रेल्बा लाबा थेन गोसाइकुन्डरि निबा गिक्खे बिमुला ।’
यकिना अगाध