आँसु नै आँसुको भेल भो जिन्दगी


आँसु नै आँसुको भेल भो जिन्दगी
हर्दमै हारिने खेल भो जिन्दगी

दुर्दशा झाङ्गिए शान्त संसारमा
यातना वर्सिने जेल भो जिन्दगी

च्यापियो बेसरी दर्दका भीडमा
पेलिँदा पेलिँदै तेल भो जिन्दगी

छैन हाँसो खुसी,छैन आनन्द याँ
भाग्य बेमानको झेल भो जिन्दगी

सुस्त बन्दै गए हात गोडा सबै
किच्चियो बोझले नेल भो जिन्दगी

पोल्छ छाती सधैँ पीरले,तापले
निल्छ संवेदले सेल भो जिन्दगी

बढ्न थाले व्यथा देह तड्पाउँदै
लाख सन्तापको मेल भो जिन्दगी

लालसा मात्र भो मानसम्मानको
‘कागका देशमा बेल’ भो जिन्दगी

SIS SIS SIS SIS
(स्रग्विणी छन्द)
कोमल भट्ट
पुरानो नैकाप-१३ ,काठमाडौँ

  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *