खाइमामि मधेश खाइमामि भोट
खाल्छेगा म्राङलाई प्राङबोला चोट…।
“साइलाबाको होटल”रि ब्लाङदार आले ह्राङलान सुररि ह्वाइ कोसि ताङ म्याप्चिमुबा। थेदा पुलिस खाबा नोन था आतानि। खालाइसे ग्याप पट्टिसे हापहोप चुङजि। ओसो फ्लिक दोसि च्यामाम पुलिसगा चिम। तिल्दा थेदा चुङजि थेसे तिलाई गोआँखाम्नि। साबुनला फिज सोक्खे मुबा या ख्रुबारि बाङ लाबागेन मुबा, पुलिससे या फ्याङचुङसि डुइसि बोर्सि भेनरि युजि। सहुदा एन भेनरि युसि चौकिरि दोना लाजि।
“एला मिन तिला ?” पुलिस अफिसरसे यारि काडि ल्हिक्पान ङ्योइजि।
“ब्लाङदार ब्लोन।” साबुनला बोप्स्या ज्याना आहार्चिबा या ङ्हि छ्यापबापन आलेसे पाङजि।
“बादर…?” तामाङ छिक आगोबासे पुलिस अफिसरसे थेला मिनदा ज्याना लासि उच्चारन लाआँखाम्नि।
“आहिन ब्लाङदार।” आलेसे या बाबाला बाबान दोसि पाङजि।
दोसिन थेला मिनदा पुलिस अफिसरसे ज्याना लासि उच्चारन लाआँखाम्नि।
“उमेर कादे ?”
“दिङ कु वाइगे लाजि।”
“एला होटलरि गे लाबा कादे ताजि ?” बिजा बुमो उत्थान गेन्दुनला प्रतिनिधिसे होटल मालिकदा ङ्योइजि।
“दिङ गि।”
“बिजा बुमोदा गेरि युला आदे बिबा था आरे ?” पुलिस अफिसरसे साहुदा काडिनाङ छेप्सिन ख्लाजि।
“माफ लाला स्हिगो। चाआम्याङबा लाइनु मुबा।” होटल साहुसे बिजि, “चुसेन क्रासि क्रासि गे हृबा हिन्ना। ङाइ ज्यालारि ठगप लाबा आरे। ला सीमाइ दाङसे पिन्बा लामुला। चाबा, क्वान्बारि नोन लेबाफेबा लाबा आरे।”
“बाल श्रमसोसन लासि ग्रेन ताम लाला।” बिजा बुमो उत्थान गेन्दुनला प्रतिनिधिसे मिल ग्लोङलाह्राङ लासि साहुदा च्याजि।
“हिन्बान साहुला गल्ती आरे।” आलेसे बिन्ती न्हाजि, “चु साहु ङाला आपातेबान मुला।”
“कुटिसि चिउ…।” पुलिस अफिसरतेन बिजा बुमो उत्थान गेन्दुनला प्रतिनिधिसे गिक्खे काइसे थेला ब्ला क्लोक चाजि, “जातुकु तासि….।”
दारे बिजा बुमोदा गेरि युसाम बाल श्रमसोसान अन्तरगत कानूनि कारबाही लासेला ब्योहोराला काजगरी सहिछाप लापुङसि होटल साहुदा चुपाल्छेदा तिर्याम माफि पिन्जि। होटल साहु पसलरि दोजि।
“दारे ङा खान निसे ? तिला चासे ? खान म्हेर्से ?” आलेसे ह्राङला देन्बा पीडा व्यक्त लाजि।
“दिमरि निउ।” पुलिस अफिसरतेन बिजा बुमो उत्थान गेन्दुनला प्रतिनिधिसे काइगिरी पाङजि।
“आपा आमा खालाई आरे। ङा जाजा मुमान डोङबा।”
“दिम आरेसाम सडकरि निसि हृसि चाउ। थेरिन म्हेर्गो।” पुलिस अफिसरसे बिजि।
“गे लासि चाबारिचा आताबा। बालअधिकार हनन ताबा। हृसि चाबारिचा ताबा ?” आलेसे क्राबान प्रश्न लाजि।
“चु कानूनि ताम हिन्ना।” बिजा बुमो उत्थान गेन्दुनला प्रतिनिधिसे पाङजि।
ब्लाङदार आले ठानाहेन्से थोन्सि गेम्हाइबारि निजि। जातुकु बिसि खालाइसे थेदा गे आपिन्नि। म्हेर्बा ग्ला, चाबा स्हे आयाङबासे दारे बोरा थोसि सडक सडक कोर्बा चुजि। तिलाई रेलिच्छा हेन्से ह्राङह्राङबान ह्रोजुगुला संगतरि सडक कुनिरि चिसि ड्रेनड्राइड प्लास्टिकला झोलारि युसि फुइबा चुजि। पुलिस अफिसर थेन बिजा बुमो उत्थान गेन्दुनला प्रतिनिधिसे थेदा कादे पटक म्राङसाइ आम्राङमाह्राङ लासि चु सडक ब्राचिजि।
यकिना अगाध